یوکرین پر حملہ آور ہونے کے بعد روس کے صدر ولادی میر پیوٹن کی ایک مبینہ خفیہ گرل فرینڈ ان دنوں بین الاقوامی ذرائع ابلاغ پر کافی موضوعِ بحث بنی ہوئی ہیں۔

روس یوکرین جنگ کے آغاز کے بعد سے ہی پیوٹن کی مبینہ گرل فرینڈ اور ایکس جمناسٹ الینا کابیوا انڈر گراونڈ ہیں۔

کچھ رپورٹس میں ان کے سوئٹزر لینڈ میں روپوش ہونے کا دعویٰ کیا جارہا ہے۔

ایسے میں روس، یوکرین اور بیلاروس کے تقریباً پچاس ہزار لوگوں نے الینا کے خلاف ایک آن لائن پٹیشن شروع کی ہے، جس میں انہیں سوئٹزرلینڈ سے بے دخل کرنے کا مطالبہ کیا جارہا ہے۔

الینا ایک روسی سیاستدان، میڈیا مینیجر اور ایک ریٹائرڈ جمناسٹ ہیں۔ انہیں اب تک کے سب سے کامیاب جمناسٹس میں سے ایک مانا جاتا ہے۔

الینا نے اپنے کریئر میں دو اولمپک میڈل، 14 ورلڈ چیمپئن شپس اور 21 یوروپین چیمپئن شپ میڈل اپنے نام کئے ہیں۔

دی گارجئین جیسے کئی اخبارات نے دعویٰ کیا ہے کہ الینا، پیوٹن کی گرل فرینڈ ہیں، حالانکہ پوتن نے کبھی بھی عوامی سطح پر اس بات کا اعتراف نہیں کیا۔

رشین ٹائمز کی ایک رپورٹ میں دعویٰ کیا گیا ہے کہ الینا اپنے تین بچوں کے ساتھ ایک لگژری وِلا میں روپوش ہیں۔

مذکورہ پٹیشن کی حمایت میں اب تک 50 ہزار سے زائد لوگ دستخط کرچکے ہیں۔

الینا کی عمر 38 سال ہے اور وہ ایک اولمپک گولڈ میڈلسٹ ہیں۔

الینا روس کی سب سے لچک دار خاتون کے طور پر جانی جاتی ہیں۔ وہ پیوٹن کی یونائٹیڈ رشین پارٹی کی ممبر پارلیمنٹ بھی رہ چکی ہیں۔

پٹیشن میں کہا گیا ہے کہ جنگ کے باوجود سوئٹزر لینڈ نے پیوٹن سرکار کی ایک ساتھی کی میزبانی جاری رکھی ہے۔

الینا سات سال سے زیادہ عرصے سے روسی سرکار کے حمایت یافتہ نیشنل میڈیا گروپ میں بورڈ آف ڈائریکٹرز کی صدر بھی ہیں۔

ڈیلی میل کے مطابق انہیں ہر سال تقریباً آٹھ ملین یورو تنخواہ بھی مل رہی ہے۔