نامور کلاتھنگ برانڈ نے شوبز انڈسٹری کی معروف شخصیات،ماڈلز اور میک اپ آرٹسٹوں کی جانب سے اداکارہ ثنا جاوید پرلگائے جانے والے الزامات کے بعد انہیں اپنی تشہیری مہم سے الگ کردیا۔

نامورکلاتھنگ برانڈ نے انسٹاگرام اسٹوری میں بتایا کہ اداکارہ  ثنا جاوید پر حالیہ دنوں میں لگائے گئے نامناسب رویے کے الزامات پر برانڈ کو سخت تشویش ہے، سنگین الزامات کے پیش نظر کمپنی نے اداکارہ کو اپنی تشہیری مہم سے الگ کرنے کا فیصلہ کیا ہے۔

کمپنی نے اپنی انسٹا اسٹوری میں تصدیق کی کہ وہ اب نئے چہرے کے ساتھ عید کلیکشن کی تشہیری مہم شوٹ کرینگے۔

کلاتھنگ برانڈ نے عید کلیکشن کے لیے حال ہی میں ماڈل منال سلیم اور ثنا جاوید کے ساتھ تشہیری مہم شروع کی گئی تھی اور متعدد فوٹوشوٹس بھی کروائے گئے تھے۔

ثنا جاوید نے بھی قانونی کارروائی کا آغاز کر دیا

 دوسری جانب اداکارہ ثنا جاوید نے نامور شخصیات اور میک اپ آرٹسٹوں کی جانب سے اپنے اوپر لگائے جانے والے الزامات پر خاموشی توڑتے ہوئے قانونی کارروائی کا بھی آغاز کیا ہے۔

گزشتہ چند دنوں کے دوران سوشل میڈیا پر ثنا جاوید کے خلاف شوبز انڈسٹری کے متعدد افراد کی جانب سے بدتمیزی اور اختیارات کے ناجائز استعمال کے الزامات عائد کیے گئے ہیں۔

ثنا جاوید نے ان الزامات کو لیگل نوٹس کے ساتھ حل کرنے کا فیصلہ کرتے ہوئے مداحوں کو اس کی اطلاع انسٹاگرام پر دی۔

اپنی پوسٹ میں اداکارہ ثنا جاوید نے کہا کہ پچھلے 72 گھنٹوں میں مجھے ہر طرح کے جھوٹ اور من گھڑت کہانیوں، نفرت انگیز تقریر اور دھمکیوں کا نشانہ بنایا گیا۔

ٹی وی کی صف اول کی خوبرو اداکارہ نے مزید لکھا کہ لوگوں کے ایک گروپ کی طرف سے میرے خلاف ایک سوچی سمجھی منصوبہ بندی کے تحت ایک مہم شروع کی گئی، جس سے ناصرف مجھے بلکہ میرے خاندان کو شدید صدمہ پہنچا ہے۔

ثنا جاوید کے معاملے کا پسِ منظر

کئی دنوں سے سوشل میڈیا صارفین خوبرو اور اداکارانہ صلاحیتوں کے بلبوتے پر شوبز میں شہرت حاصل کرنے والی اداکارہ ثنا جاوید پر پابندی کا مطالبہ کررہے ہیں۔

نامور اداکارہ نے مجھے”دو ٹکے کی ماڈل”کہا،منال سلیم کا انکشاف

پاکستان کی نامور ماڈل منال سلیم نے گزشتہ روز ثنا جاوید کا نام لئے بغیر ان کی جانب سے برتے جانے والے غیر مناسب رویے کا انکشاف کرتے ہوئے اداکاراؤں کے ساتھ کام کرنے سے معذرت کرلی۔

سوشل میڈیا رپورٹس کے مطابق ماڈل گرل منال سلیم نے دعویٰ کیا ہے کہ شوٹ کے دوران ایک معروف اداکارہ نے انہیں “دو ٹکے کی ماڈل” قرار دیا جس کے بعد انہوں نے فیصلہ کیا ہے کہ وہ کسی بھی سلیبرٹی کے ساتھ فوٹو شوٹ نہیں کرائیں گی۔

سماجی رابطے کی ویب سائٹ انسٹاگرام پراپنے ایک پیغام میں منال سلیم نے کہا کہ وہ تمام کلائنٹس سے گزارش کریں گی کہ آج کے بعد انہیں کسی اداکارہ یا سلیبرٹی کے ساتھ شوٹ کرنے کیلئے کبھی نہ کہیں کیونکہ یہ نام نہاد اداکارائیں ہمیں “دو ٹکے کی ماڈل” سمجھتی ہیں۔

منال سلیم نے بتایاکہ ہم بھی کام کرنے آتے ہیں، مفت میں ذلیل ہونے نہیں آتے۔

ماڈل گرل منال نے اگرچہ اپنی پوسٹ میں کسی اداکارہ کا نام نہیں لیا تاہم بہت سے سوشل میڈیا صارفین نے اس واقعے کا ذمہ دار ثناء جاوید کو قرار دیا۔

معروف میک اپ آرٹسٹ اکرام گوہر نے بھی کہا کہ وہ جانتے ہیں کہ ایسا رویہ اپنانے والی ثنا جاوید ہیں۔

دوسری جانب منال نے ایک اور انسٹااسٹوری شیئر کرتے ہوئے اپنی حمایت میں کھڑے ہونے والے آرٹسٹ اور سوشل میڈیا صارفین کا شکریہ ادا کیا اور لکھا کہ جو لوگ مجھ سے اداکارہ کا نام پوچھ رہے ہیں وہ سب صحیح اندازے لگارہے ہیں۔

ثنا جاوید معافی مانگیں

سوشل میڈیا پر ثنا جاوید کی جانب سے ماڈلز اور میک اپ آرٹسٹوں کے ساتھ کی جانے والی بدسلوکی کے بارے میں لوگ باتیں کررہے ہیں اور اداکارہ پر شدید تنقید کرتے ہوئے ان پر پابندی لگانے کا مطالبہ کررہے ہیں۔

سوشل میڈیا صارفین کا موقف ہے کہ انڈسٹری اورعوام دونوں کو ثنا جاوید پر پابندی لگانی چاہئے اور ثنا جاوید کو ان تمام لوگوں سے معافی مانگنی چاہئے جن کے ساتھ انہوں نے برا سلوک کیا۔