کراچی کے نیشنل اسٹیڈیم میں پاکستان کے خلاف دوسرے ٹیسٹ کے پہلے دن آسٹریلیا نے 3 وکٹوں کے نقصان پر 251 رنز بنا لئے۔

نیشنل اسٹیڈیم میں کھیلے جانے والے سیریز کے دوسرے ٹیسٹ میں ٹاس جیت کر آسٹریلیا نے پہلے بیٹنگ کا فیصلہ کیا۔

آسٹریلیا کی جانب سے ڈیوڈ وارنر اور عثمان خواجہ نے اننگ کا آغاز کیا، آسٹریلوی بیٹرز نے ابتداء سے ہی سست بیٹنگ کا مظاہرہ کیا، دونوں اوپنرز کے مابین 82 رنز کی شراکت داری قائم ہوئی۔

ڈیوڈ وارنر 36 رنز بنا کر فہیم اشرف کی گیند پر وکٹوں کے عقب میں محمد رضوان کے ہاتھوں کیچ آؤٹ ہو گئے۔

ون ڈاؤن کی پوزیشن پر آنے والے مارنس لیبوشین کھاتہ کھولے بنا ہی پویلین لوٹ گئے، وہ ایک رن لینے کی کوشش میں ساجد کی براہ راست تھرو کا شکار ہو گئے.

دو وکٹوں کے نقصان کے بعد اسٹیو اسمتھ اور عثمان خواجہ نے تیسری وکٹ کی شراکت میں 160 رنز بنے۔ اس دوران عثمان خواجہ نے شاندار سنچری اسکور کی وہ ابھی بھی کریز پر موجود ہیں۔

اسٹیو اسمتھ 72 کے انفرادی اسکور پر حسن علی کی گیند پر فہیم اشرف کو اپنا کیچ دے بیٹھے۔

اسٹیو اسمتھ دن کے اختتام سے صرف ایک اوور پہلے آؤٹ ہوئے۔

آسٹریلیا کل 251 رنز تین کھلاڑی آؤٹ پر اپنی اننگ دوبارہ شروع کرے گا۔