راجہ اظہر نے کہا ہے کہ 28 مارچ کو معلوم ہوگا کہ حکم کا پتہ کس کے ہاتھ میں ہے۔

پی ٹی آئی سندھ کے نائب صدر و رکن سندھ اسمبلی راجہ اظہر نے سہیل انور سیال کے بیان پر ردعمل دیتے ہوئے کہا ہے کہ پی پی نے سہیل انور سیال کو پرس اٹھانے والے کولی کیساتھ ساتھ سندھ ہاؤس کا چوکیدار نامزد کردیا ہے۔

انہوں نے کہا کہ پی پی رہنما کو سمجھنا چاہیے کے ٹائیگر فورس کی تربیت آصف زرداری نے نہیں کی، گورنر ہاؤس اور قصر ناز پر حملے کی دھمکی دینے والے وزیر اعلیٰ ہاؤس اور بلاول ہاؤس کو مت بھولیں۔

راجہ اظہر نے کہا کہ سندھ ہاؤس پیپلز پارٹی کی ذاتی جاگیر نہیں، سندھ ہاؤس میں پی پی نے ضمیروں کا بازار لگا دیا ہے، سہیل انور کے بیان سے ان کی گھبراہٹ عیاں ہورہی ہے۔

پی ٹی آئی سندھ کے نائب صدر و رکن سندھ اسمبلی نے کہا کہ سندھ ہاؤس میں سندھ کی ترقی کا پیسہ موجود ہے، سندھ ہاؤس میں جاری ہارس ٹریڈنگ کا عمل زیادہ دن پردے میں نہیں رہے گا۔

انہوں نے کہا کہ پیپلز پارٹی ضمیر خریدنے پر جتنا پیسہ لٹائے آخر میں سرپرائز کیلئے تیار رہے، 28 مارچ کو جمہوریت کے جعلی دعویداروں کو معلوم ہوگا حکم کا پتہ کس کے ہاتھ میں ہے۔

واضح رہے کہ پاکستان پیپلز پارٹی کے رہنما، سابق صوبائی وزیر داخلہ، رکن سندھ اسمبلی سہیل انور سیال نے بیان دیتے ہوئے کہا تھا کہ اگر عمران خان نے اپنی ٹائیگر فورس یا اسلام آباد پولیس استعمال کی تو سندھ میں بھی گورنر ہاؤس اور قصرِ ناز ہے۔

سہیل انور کا کہنا تھا کہ عمران خان یاد رکھیں کہ ان کے کچھ اراکین اسمبلی بھی سندھ میں رہتے ہیں، اگر ہمارے خلاف کچھ ہوا تو ردعمل بھی آسکتا ہے۔

ان کا کہنا تھا کہ ہم آئین اور قانون کی پاسداری کرنے والے لوگ ہیں، ہم کسی صورت کوئی غیر جمہوری اقدام نہیں کریں گے۔

انہوں نے کہا تھا کہ عمران خان ہمیں مت اکسائیں، گیم آپ کے ہاتھ سے نکل چکی ہے، ہم ہر طرح کی صورت حال سے نمٹنا جانتے ہیں۔