راولپنڈی میں اے ٹی ایم مشینوں کو ڈیوائسز لگا کر پیسے نکالنے والے بین الاقوامی گروہ کا انکشاف ہوا ہے۔

وفاقی تحقیقاتی ادارہ (ایف آئی اے) راولپنڈی نے اے ٹی ایم مشینوں کو ڈیوائسز لگا کر پیسے نکالنے والے گروہ کے 3 ارکان بھائیوں کو گرفتار کر لیا ہے۔

ذرائع کے مطابق گروہ برازیل سے آپریٹ کررہا ہے اور غیر ملکی پاکستان آکر ٹریننگ بھی کراتے ہیں۔

ایف آئی اے نے غیر ملکیوں کے حوالے سے بھی تفتیش کا دائرہ کار وسیع کر دیا ہے۔

ایف آئی اے حکام نے بتایا کہ ملزمان اے ٹی ایم مشینوں کے ساتھ ڈیوائسز لگا کر کارڈز کا ڈیٹا اکٹھا کرتے تھے اور وہ ڈیٹا بیرون ملک بھجوایا جاتا تھا جس کے بعد اکاؤنٹ سے رقم نکال لیتے تھے۔

گرفتار تینوں ملزمان سگے بھائی ہیں جن کو ٹیکسلا سے گرفتار کیا گیا ہے، گرفتار ہونے والوں میں عمران، خالد اور فرحان شامل ہیں۔

واضح رہے کہ یہ ملزمان پاکستان میں بھی غیر ملکیوں سے ٹریننگ لیتے رہے ہیں۔

یہ بھی پڑھیں: اے ٹی ایم مشین چوری کرنے کی کوشش کے واقعے میں اہم پیش رفت