شہباز گِل نے کہا ہے کہ عوامی عدم اعتماد کی وجہ سے ہی مولانا کی سیاست ختم ہوئی۔

معاون خصوصی برائے سیاسی ابلاغ ڈاکٹر شہباز گِل نے مولانا فضل الرحمان کے بیان پر ردعمل دیتے ہوئے کہا ہے کہ عوام کے اعتماد نے عمران خان کو وزارت عظمیٰ بخشی۔

انہوں نے کہا کہ عوام نے ملک لوٹنے والوں پر عدم اعتماد کا اظہار کیا، عوامی عدم اعتماد کی وجہ سے ہی مولانا کی سیاست ختم ہوئی، مولانا کو بنگلہ نمبر 22 اور کشمیر کمیٹی کے چیئرمین شپ سے ہاتھ دھونا پڑے۔

شہباز گِل نے کہا کہ عوام کے عمران خان پر اعتماد کی وجہ سے آج چوروں کا ناطقہ بند ہے، عمران خان پر عوام کا اٹل اعتماد ہی ملک کو ترقی کی منازل طے کروائے گا۔

واضح رہے کہ سربراہ جے یو آئی (ف) مولانا فضل الرحمان نے میڈیا سے گفتگو کرتے ہوئے کہا تھا کہ لیاقت خٹک اور احد خٹک کو جمیعت علماء اسلام میں شمولیت پر خیر مقدم کرتا ہوں۔

انہوں نے کہا تھا کہ امید ہے انکے اس فیصلے سے جمیعت علماء اسلام کے نظریہ کو تقویت ملے گی، لیاقت خٹک کی اپنی ایک اہمیت اور حیثیت ہے، سابق وزیر اعلیٰ پرویز خٹک کے بھائی ہیں اور صوبائی اسمبلی کے رکن ہیں۔

مولانا فضل الرحمان نے کہا تھا کہ انکے اپنے گھر سے دنیا نے انکے خلاف عدم اعتماد کی آواز سن لی ہے، ہمارے کپتان کہتے ہیں بڑا کھلاڑی ہوں مجھے مقابلہ کرنا آتا ہے، عدم اعتماد کے مقابلے کا تو وہ سوچ رہا ہے کیا اس نے ملک میں مہنگائی کے لئے ایسی کوشش کی؟

سربراہ جے یو آئی (ف) نے کہا تھا کہ کیا اس ملک میں عام آدمی کی غربت کے خاتمے اور معیشت کی بحالی کی صلاحیت ہے؟ ایک کروڑ نوکریوں کا لالچ دیا، کیا اس ناکامی کا دفاع کرنے کی صلاحیت ہے؟