ہندوقوم پرست تنظیم آر ایس ایس نے ترک شہری محمد ایلکر آئجی کی بطور سی او او ایئر انڈیا میں تقرری کی مخالفت کردی ہے۔آئجی ماضی میں ترکی کے صدر رجب طیبب ایردوآن کے مشیر برائے ہوا بازی رہ چکے ہیں۔

غیر ملکی خبر رساں ادارے کے مطابق ہندو قوم پرست حکمراں جماعت بھارتیہ جنتا پارٹی کی مربی تنظیم راشٹریہ سویم سیوک سنگھ (آر ایس ایس) نے بھارت کے صنعتی گھرانے ٹاٹا گروپ کی جانب سے ترک شہری محمد ایلکر آئجی کو ایئر انڈیا کا نیا سی ای او اور منیجنگ ڈائریکٹر مقرر کیے جانے پر ناراضگی کا اظہار کرتے ہوئے حکومت سے مطالبہ کیا ہے کہ وہ ان کی تقرری کو منظوری نہ دے۔

دوسری جانب ٹاٹا نے آئجی کو ایوی ایشن انڈسٹری کا رہنما قرار دیتے ہوئے کہا کہ وہ ایئر انڈیا کو ایک نئے دور میں لے جانے میں قائدانہ کردار ادا کریں گے۔ جبکہ آئجی نے اس ذمہ داری کو قبول کرتے ہوئے کہا کہ وہ ایک اہم ترین ایئرلائنز کی قیادت کرنے میں مسرت محسوس کرتے ہیں۔

واضح رہے، آئجی کو یکم اپریل سے قبل اپنے عہدے کا چارج سنبھالنا ہے۔ بھارتی قانون کے مطابق کسی غیر ملکی کو سی ای او بنائے جانے پر حکومت سے کلیئرنس لینا ضروری ہوتی ہے۔

آرا یس ایس کی ذیلی تنظیم اور اس کے اقتصادی ونگ سودیشی جاگرن منچ ایس جے ایم  نے آئجی کی تقرری پر تحفظات کا اظہار کیا ہے۔

ایس جے ایم کے قومی کنوینر اشونی مہاجن کا اس حوالے سے کہنا تھا کہ ایوی ایشن انڈسٹری کا موازنہ چِپ بنانے والی کمپنی سے نہیں کیا جاسکتا۔ یہ قومی سلامتی کا معاملہ ہے۔ ہمیں بہت محتاط رہنا چاہیے۔ آئجی کا ترکی کے موجودہ صدر رجب طیب ایردوان کے ساتھ تعلق تشویش کا موجب ہے۔

ان کا مزید کہنا تھا کہ حکومت کو چاہیے کہ آئجی کی تقرری کو منظوری نہ دے کیونکہ ترکی نہ صرف بھارت کے دیرینہ حریف پاکستان کا دوست ہے بلکہ کشمیر کے حوالے سے اس کا مؤقف بھی بھارت کی پالیسیوں کے برخلاف ہے۔