خادم حرمین شریفین شاہ سلمان بن عبدالعزیز نے صدر پاکستان ڈاکٹرعارف علوی کے نام خط لکھ کر 23 مارچ یوم پاکستان کی مبارکباد  دی ہے۔

سعودی فرمانروا خادم الحرمین شریفین شاہ سلمان نے صدر پاکستان ڈاکٹر عارف علوی کے نام تہنیتی پیغام میں ان کی پائدار صحت و عافیت، پاکستانی حکومت اور پاکستانی بھائیوں کی مزید ترقی و خوشحالی کے حوالے سے نیک خواہشات کا اظہار کیا ہے۔

ولی عہد نائب وزیراعظم و وزیر دفاع شہزادہ محمد بن سلمان نے بھی صدر ڈاکٹرعارف علوی کے نام تنہیتی پیغام میں یوم پاکستان پر صدر کو دلی مبارکباد دی ہے۔

ولی عہد نے صدر پاکستان کی مکمل صحت و عافیت، پاکستانی حکومت اور پاکستانی بھائیوں کے لیے مزید ترقی و خوشحالی کی نیک خواہشات کا اظہار کیا۔

یاد رہے ملک بھر میں یوم پاکستان23مارچ قومی جوش و جذبے، ملی حمیت اور شایان شان و بھرپور طریقے سے منایا جائیگا جبکہ اس موقع پر پروگرامات منعقد کئے جائیں گے اور قومی پرچم بھی لہرائے جائیں گے۔

یوم پاکستان کے مقدس موقع پر وفاقی دارالحکومت میں 31اور صوبائی دارالحکومتوں میں 21,21توپوں کی سلامی دی جائے گی۔

واضح رہے کہ یوم پاکستان ہر سال 23مارچ 1940کوقرار داد پاکستان کی منظوری کے حوالے سے مینار پاکستان لاہور کے مقام پر ہو نے والے جلسہ عام کی یاد میں بھر پور تزک و احتشام سے منایا جاتا ہے۔

23 مارچ کے موقع پر حکومت کی جانب سے عام تعطیل کے اعلان کے باعث اسٹیٹ بینک آف پاکستان، سٹیٹ بینک بینکنگ سروسز آف پاکستان، تمام شیڈولڈ بینک، مالیاتی ادارے، چیمبرز آف کامرس، سٹاک ایکسچینجز گا رنٹیز لمیٹڈ، عدالتیں اور تمام سرکاری و نیم سرکاری ادارے بند رہیں گے۔