خیبرپختونخوا فوڈ سیفٹی اتھارٹی کی جانب سے کی گئی کارروائی کے نتیجے میں غیرمعیاری خوردنی تیل برآمد  کرلیا گیا ہے۔

تفصیلات کے مطابق کارروائی مردان میں ڈسٹری بیوشن یونٹ پر کی گئی جس کے نتیجے میں 13 ہزار لیٹر سے زائد غیر معیاری خوردنی تیل برآمد کرلیا گیا ہے۔

 فوڈ سیفٹی اتھارٹی کا کہنا ہے کہ یونٹ سے مختلف برانڈز کے نام پر پیک شدہ غیرمعیاری خوردنی تیل برآمد کیے گئے ہیں۔

فوڈ سیفٹی اتھارٹی حکام نے بتایا کہ ضبط شدہ خوردنی تیل کو ریفائننگ کے عمل سے نہیں گزارا گیا، استعمال شدہ کنستر میں پیک گیا تھا۔

فوڈ سیفٹی اتھارٹی حکام نے مزید بتایا کہ چھاپے کے دوران یونٹ کو سیل کرکے خوردنی تیل فروخت کرنے پر ملوث افراد کے خلاف سخت قانونی کاروائی کا بھی حکم دے دیا گیا ہے۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔