واٹس ایپ نے گوگل پلے بی ٹا پروگرام کے ذریعے ایک نئی اپ ڈیٹ پیش کردی ہے۔ جس کی مدد سے صارفین کے صوتی پیغامات کی ریکارڈنگ کو مزید سہل کردیا گیا ہے۔

واٹس ایپ میں ہونے والی تبدیلیوں پر نظر رکھنے والی ویب سائٹ وے بی ٹا انفوکے مطابق بی ٹا ٹیسٹرز کے لیے ورژن 2.22.6.7 کے ذریعے دی گئی اس اپ ڈیٹ میں اسعتمال کنندگان گروپ یا انفرادی طور پر کسی کو بھی آڈیو( صوتی ) پیغام کو بھیجنے سے قبل ریکارڈنگ کے دوران اسے روکنے اور بحال کرنے کے اہل ہوگئے ہیں۔

’ پاؤس اینڈ ریزیوم وائس ریکارڈنگس ‘ کے نام سے پیش کیے گئے اس فیچر کو مخصوص بی ٹا اکاؤنٹس کے لیے جاری کیا گیا ہے تاہم ورژن2.22.6.7 کے حامل صارفین بھی اس سے مستفید ہوسکتے ہیں۔

رپورٹ کے مطابق واٹس ایپ اس فیچر کو آئی او ایس اور ڈیسک ٹاپ صارفین کے لیے کچھ عرصے قبل متعارف کرواچکا ہے۔ تاہم اینڈروئیڈ کے استعمال کنندگان اس فیچر سے اب تک محروم تھے۔

نئی اپ ڈیٹ کے بعد استعمال کنندگان وائس نوٹ ریکارڈ کرتے وقت ( ویو فارم) صوتی لہروں کو دیکھنے کے ساتھ ساتھ انہیں درمیان سے روک بھی سکتے ہیں۔

رپورٹ میں شایع اسکرین شاٹ کے مطابق واٹس ایپ کی وائس نوٹ ریکارڈنگ میں pause بٹن کو دیکھا جاسکتا ہے، اس بٹن کو ٹیپ کرکے صارفین ریکارڈنگ کو روکنے اور دوبارہ چلانے کے اہل ہوسکتے ہیں۔