نیٹو کے سیکریٹری جنرل ژانزاسٹولٹن برگ نے خبردار کیا ہے کہ یوکرین پر جوہری حملہ نیٹو اور روس کے درمیان ایٹمی جنگ کی صورت اختیار کرسکتا ہے۔

اسٹولٹن برگ نے کہا ہے کہ روس ایٹمی ہتھیاروں کی دھمکیاں دینے سے باز رہے، صدر پیوٹن نے کافی بڑی غلطی کی ہے اور اگر یوکرین پر کیمیائی ہتھیاروں سے حملہ کیا گیا تو جنگ کی نوعیت بدل جائے گی۔

سیکریٹری جنرل نے کہا ہے کہ نیٹو یوکرین کی حمایت کرتا ہے لیکن جنگ کا حصہ نہیں، جبکہ اس جنگ کو یوکرین تک محدود رکھنا انتہائی ضروری ہے۔

اسٹولٹن برگ نے کہا کہ اگرچہ نیٹو یوکرین جنگ کا حصہ نہیں ہے تاہم کسی بھی وقت اتحادیوں کی حفاظت اور دفاع کے لیے نیٹو تیار ہے۔

انہوں نے مزید کہا کہ ایٹمی جنگ میں جیت کسی کی بھی نہیں ہوتی،روس بھی کبھی بھی ایٹمی جنگ نہیں جیت سکتا، نیٹو تنازعہ کا حصہ نہیں ہے تاہم وہ یوکرین کو مدد فراہم کرتا رہے گا۔

نیٹوسربراہ نے روس کی حمایت کرنے پر چین اور بیلاروس پر بھی تنقید کی انہوں نے کہا ہے کہ امید کرتاہوں کہ نیٹو ممالک چین کو اس کی ذمہ داریاں یاد دلائیں گے۔