مغربی طاقتوں نے روس کو متنبہ کیا ہے کہ ایرانی جوہری معاہدے کو سبوتاژ نہ کرے۔ ایسے میں روس نے کہا ہے کہ معاہدہ ہونے سے قبل امریکہ اسے یہ ضمانت دے کہ جوہری معاہدہ بحال ہو جانے کی صورت میں ایران کے ساتھ اس کے اقتصادی تعلقات متاثر نہیں ہوں گے۔

غیر ملکی خبر رساں ادارے کے مطابق مغربی طاقتوں نے روس کو متنبہ کیا کہ وہ ان کوششوں کو سبوتاژ کرنے سے باز رہے۔ امریکہ کی نائب وزیر خارجہ وکٹوریہ نولینڈ کا کہنا ہے کہ روس جوہری معاہدے کی بحالی کی کوشش میں اپنی شرکت کا اضافی فائدہ حاصل کرنے کی کوشش کر رہا ہے لیکن وہ اس میں کامیاب نہیں ہو سکے گا۔روس جوہری معاہدے کے حوالے سے اپنے مطالبات پر زور دینے اور اسے وسیع کرنے کی کوشش کر رہا ہے۔

برطانیہ، فرانس اور جرمنی نے جوہری سرگرمیوں پر نگاہ رکھنے والے اقوام متحدہ کے ادارے کو ارسال کردہ ایک مشترکہ بیان میں کہا ہے کہ ایک اہم موقع ہاتھ سے نکل رہا ہے۔ ہم تمام فریقین سے مطالبہ کرتے ہیں کہ وہ اس معاہدے کو ابھی مکمل کرنے کے لیے ضروری فیصلے کریں اور روس سے مطالبہ کرتے ہیں کہ وہ اس فیصلے میں غیر متعلق شرائط شامل نہ کرے۔

سفارت کاروں کا کہنا ہے کہ اب بھی کئی اختلافات کو دور کرنے کی ضرورت ہے۔ ان میں یہ بھی شامل ہے کہ ایران پر کون سی پابندیاں عائد رہیں گی بالخصوص ایران کے پاسداران انقلاب فورس کے حوالے سے فیصلے واپس لیے جائیں گے یا نہیں اور واشنگٹن اس ضمن میں کیا ضمانتیں دیتا ہے۔

دریں اثناء،  فرانس نے متنبہ کیا  ہے کہ مزید تاخیر عالمی طاقتوں اور ایران کے درمیان بحال ہونے والے جوہری معاہدے کو روک سکتی ہے۔

فرانسیسی وزارت خارجہ کے ترجمان نے اضافی ضمانتوں کے متعلق روس کے مطالبات کے حوالے سے کہا کہ ہم ایک معاہدے کے بہت قریب ہیں، لیکن پیرس ان خطرات کے بارے میں بہت فکر مند ہے، جو مزید تاخیر کے سبب بن سکتے ہیں۔