وزیراعظم کے معاون خصوصی برائے سیاسی ابلاغ ڈاکٹر شہباز گِل کا کہنا ہے کہ عوام کے ووٹوں سے نہ آنے والے ہی غیر جمہوری “قومی حکومت” کی بات کر سکتے ہیں۔

ڈاکٹر شہباز گِل نے شاہد خاقان عباسی کے بیان پر ردعمل دیتے ہوئے کہا کہ نااہل لیگ کے پاس ماسوائے چھانگا مانگا سیاست کے کچھ نہیں، نااہل میاں نے ازل سے خرید وفروخت کے ذریعے اقتدار پایا۔

انہوں نے کہا کہ جمہوری روایات کے منافی میاں مفرور نے ہمیشہ ضمیر خریدے، میاں مفرور کی سیاسی سوچ انکی پارٹی میں بھی پروان چڑھی۔

شہباز گِل نے مزید کہا کہ نااہل درباری نے ببانگ دہل ہارس ٹریڈنگ کو قبول کیا، نااہل لیگ میں اوپر سے نیچے تک ضمیر فروش بیٹھے ہیں۔

اس سے قبل مسلم لیگ ن کے رہنما شاہد خاقان عباسی نے میڈیا سے بات کرتے ہوئے کہا تھا کہ حکمران ناکام ہوچکے ہیں، حکومت کے دن گنے جاچکے ہیں اور عوام نے بھی اپنا فیصلہ سنادیا ہے، عوام موجودہ حکومت سے جلد نجات پانے والی ہے۔

ان کا کہنا تھا کہ 20 سے زائد اراکین  اپوزیشن کےساتھ ہیں اور اس تعداد میں اضافہ ہوسکتا ہے، اقتدار چھوڑنے والے پی ٹی آئی  اراکین  پارٹی کی طرف سے ہر سزا کے لیے تیار ہیں، یہ اپنی سیاست اور کرسی داو پر لگاکر  آئے ہیں۔

شاہد خاقان عباسی نے کہا کہ پی ٹی آئی اراکین نے محسوس کیا کہ عمران  خان درست حکومت نہیں چلاسکتے، گزشتہ روز پی ٹی  آئی اراکین کے بیانات سب کے سامنے تھے، کسی ایم این اے نے پیسوں کی کوئی بات نہیں کی اور اگر کسی ایک رکن نے بھی رقم لی ہو تو وہ سامنے آکر بتادیں۔