پاکستان مسلم لیگ (ن) کے ڈپٹی سیکرٹری جنرل عطاء اللہ تارڑ نے کہا ہے کہ  دنیا میں یہ پہلی حکومت ہے جو اپوزیشن کے خلاف جلسے کرتی ہے۔

تفصیلات کے مطابق پاکستان مسلم لیگ (ن) کے ڈپٹی سیکرٹری جنرل عطاء اللہ تارڑ نے انتخابی مہم پر الیکشن کمشن کے خلاف عمران خان اور اسد عمر کی درخواست کو عدم اعتماد کی کامیابی کا حکومتی اعتراف قرار دے دیا ہے۔

   جنرل عطاء اللہ تارڑ نے کہا کہ عمران نیازی کی درخواست الٹا چور کوتوال کو ڈانٹے کے مترادف ہے دنیا میں یہ پہلی حکومت ہے جو اپوزیشن کے خلاف جلسے کرتی ہے، اسمبلی میں نہیں آتی۔

عطاء اللہ تارڑ نے کہا کہ آئین اور قانون سے نابلد حکومت من مانی کرنا چاہتی ہے، خود کو قانون کے تابع نہیں سمجھتی۔

انہوں نے کہا کہ اسلام آباد میں وزیراعظم لگے شخص کے پاس ملک اور عوام کی خدمت میں دکھانے کو کچھ نہیں، قانون سے تجاوز کرنے والے الیکشن کمشن پر قانون سے تجاوز کا الزام لگا رہے ہیں۔

ڈپٹی سیکرٹری کا کہنا تھا کہ درخواست ثبوت ہے کہ عمران نیازی کا مزاج جمہوری ہے اور نہ کردار ، الیکشن کمشن کے آئینی و قانونی احکامات کی خلاف ورزی پر عمران نیازی کو سزا ملنی چاہیے۔

انہوں نے مزید کہا کہ مغربی جمہوریت کی مثالیں دینے والے کو یہ تو پتہ ہونا چاہیے کہ مغرب میں سرکاری وسائل استعمال کر کے وزیراعظم اور حکمران جماعت کے جلسے نہیں ہوتے۔