منوڑہ کے گہرے سمندر سے سطح آب پر تیرتی ہوئی دیوقامت مردہ وہیل برآمد کر لی گئی۔

رپورٹ کے مطابق شہرِ قائد کے ساحل منوڑہ کے قریب دیوقامت مردہ برائیڈز وہیل پانی کی سطح پر تیرتی ہوئی پائی گئی ہے جس کو مسافر کشتی کے ذریعے کراچی فش ہاربر منتقل کر دیا گیا ہے۔

کراچی فش ہاربر کے ماہی گیروں کا کہنا ہے کہ بھاری بھرکم وہیل کی موت کسی بحری جہاز سے ٹکرانے وجہ سے ہوئی تاہم وہیل کے جسم پر جہاز سے ٹکرانے کے نتیجے میں کوئی زخم دکھائی نہیں دیا اس لئے وجہ کچھ اور بھی ہو سکتی ہے۔

ڈبلیو ڈبلیو ایف پاکستان کے مطابق مردہ وہیل گزشتہ رات کراچی پورٹ کے ایسٹ ہارف پر تقریباً 2 بجے برتھ نمبر 3 کے سامنے تیرتی ہوئی مردہ پائی گئی اور صبح 4 بجے کے قریب بابا بھٹ کی طرف بڑھی، جس کو مسافر کشتی کے ذریعے کراچی فش ہاربر منتقل کیا گیا تھا۔

حکام کا کہنا ہے کہ یہ تیسری برائیڈ وہیل ہے جو پاکستانی سمندری حدود میں مردہ پائی گئی ہے اور امکان ظاہر کیا جا رہا ہے کہ اس کی موت ماہی گیر کے جال میں پھنسنے سے ہوئی۔

تاہم تکنیکی مشیر ڈبلیو ڈبلیو ایف محمد معظم خان نے کہا ہے کہ یہ برائیڈز وہیل ہے جو پاکستان میں پائی جانے والی تین کروڑ وہیلز میں سے ایک ہے۔

انہوں نے بتایا کہ گزشتہ چار ماہ کے دوران یہ تیسری وہیل مردہ پائی گئی ہے، اس سے قبل اکتوبر 2021 میں سرکی کلمت خوڑ، دوسری جنوری 2022 میں چرنا جزیرے کے قریب مردہ حالت میں  تیرتی ہوئی پائی گئی جبکہ اس نوعیت کا یہ تیسرا واقعہ رونما ہوا ہے۔

محمد معظم خان نے بتایا کہ عالمی سطح پر اور پاکستان میں بھی اس وہیل کی آبادی خطرناک حد تک کم ہو رہی ہے، تاہم اس بات کو مدِنظر رکھتے ہوئے وہیل کے تحفظ کے لیے ماہی گیروں اور عام لوگوں میں شعور اجاگر کرنے کی اشد ضرورت ہے۔