رياضى کی پسندیدگی کی شرح بہت کم ہے اور یہ ایک خشک مضمون بھی سمجھا جاتا ہے۔

دنیا میں ہر شعبہ ہی ریاضی کا محتاج نظر آتا ہے، اس کے بغیر نہ تو سائنس کا وجود ممکن ہے اور نہ ہی بنیادی سائنس کی تکمیل ہو سکتی ہے-

پاکستان میں علم ریاضی کى صورتحال بالکل مختلف ہے، نظام، نصاب اور مُعلم زبوں حالی کا شکار ہيں، کہیں نصاب بہتر ہے تو علم بانٹنے والے انصاف نہیں کر پاتے، اداروں میں رياضى کے لئے سخت مزاج کے حامل اساتذہ کا انتخاب المیہ اور اداروں کی سمجھ بوجھ کا ثبوت ہے-

 حساب پڑھانے کے لئے پیشتر اداروں میں خاص طور پر تناؤ کا ماحول اپنايا جاتا ہے اور نتیجتاً مضمون کو سمجھنے کے بجائے محض سوالات حل کرنے کا کلچر عام ہوگيا ہے جس سے طلبا کی سمجھ میں کچھ نہیں آتا۔

 ایک اچھا استاد ہی اچھا معاشرہ ديتا ہے لیکن افسوس يہاں نہ تو اساتذہ اپنی ذمہ داریوں سے واقف ہیں اور نہ خود کو ترقی یافتہ ممالک کے تحت اب گریڈ کرنے پر رضامند نظر آتے ہیں-

اس کے علاوہ پڑھانے والا مضمون کو جس نوعیت سے لیتا اور پڑھاتا ہے، اُسی اعتبار سے طلبا میں مضمون کو لينے کی اہلیت بن جاتی ہے، سوالات کو رٹے رٹائے انداز سے کروانا طلبا میں محدودیت کا سبب بن رہا ہے۔

طلبا سوال کو حل کرنے اور کھوجنے کی صلاحیت سے محروم ہو رہا ہے، مختلف پہلوؤں سے سوچنے کے اہليت نشونما نہیں ہو پاتی اور نتیجتاً حساب غير دلچسپ اور مشکل مضمون لگنے لگتا ہے-

 علمِ ریاضی کے متعلق غلط تصورات رائج کر دیے گئے ہیں  جہاں والدین پریشان دکھائی دیتے ہیں، وہيں بچوں کو زیادہ ریاضی پڑھنے سے ٹوکتے بھى ہیں کہ کہیں ایسا کرنے سے دماغ خشک نہ ہو جائے-

ماہرین تعلیم کی آراء کی روشنی میں نصاب کى جديد طريقہ ہائے تعليم کے تحت تشکیل اور اساتذہ کی نئے سرے سے تربیت وقت کى اہم ضرورت ہے تاکہ طلبا ریاضی بنیادی اصولوں کے مطابق سمجھ سکیں- ہندسوں، علامتوں کی سمجھ بوجھ ، بنیادی اصولوں کا مقصد، کلیے قانون کے استعمال جیسے رموز سے آشنا ہوں گے تو پھر عين ممکن ہے کہ ہمارے طلبا ریاضی کو پڑھنے کا مقصد اور روزمرہ زندگی سے جوڑنے کے قابل ہوسکيں۔