صوبائی وزیر صنعت و تجارت میاں اسلم اقبال نے کہا ہے کہ پاکستان ہمارا ملک ہے جسے ملکر سنوارنا ہے۔

میاں اسلم اقبال نے تقریب سے خطاب کرتے ہوئے کہا کہ آزادی بڑی نعمت ہے، اس کی قدر کرنی چاہیے، اللہ تعالیٰ نے آزاد ملک دیا جہاں ہم اپنی مرضی سے زندگی گزار رہے ہیں۔

صوبائی وزیر صنعت نے کہا کہ پاکستان بیش بہا قربانیوں کے بعد نصیب ہوا ہے، پاکستان ہمارا ملک ہے جسے ملکر سنوارنا ہے۔

انہوں نے کہا کہ بچے قیمتی سرمایہ، انکی تعلیم وتر بیت والدین کی ذمہ داری ہے، تعلیم شعور دیتی ہے اور تربیت شخصیت میں نکھار لاتی ہے۔

صوبائی وزیر کا کہنا ہے کہ معاشرے کو کارآمد شہری دینے کے لئے بچوں کی اچھی تربیت کریں، دینی تعلیم بچوں کی پرورش میں ٹھہراؤ لاتی ہے، بچوں کی دینی تعلیم پر بھی بھرپور توجہ دی جائے۔

اسلم اقبال نے مزید کہا کہ بچوں پر سختی کی بجائے انہیں دوستانہ ماحول دیں اور بچی کو تعلیم دینا ایک خاندان کو تعلیم دینا ہے، والدین بچیوں کی تعلیم پر بھی توجہ دیں۔

واضح رہے کہ الائیڈ اسکول مسعود کیمپس اقبال ٹاؤن کی سالانہ تقریب تقسیم انعامات انعقاد ہوا جس میں صوبائی وزیر صنعت و تجارت میاں اسلم اقبال مہمان خصوصی تھے۔

صوبائی وزیر نے پوزیشن ہولڈرز میں انعامات تقسیم کئے اور بچوں نے ملی نغمے پر شاندار پرفارمنس کا مظاہرہ کیا۔

تقریب میں اساتذہ، والدین، اسکول انتظامیہ اور بچوں کی کثیر تعداد نے شرکت کی۔