وزیر توانائی پنجاب ڈاکٹر اختر ملک نے کہا ہے کہ جب تک دم ہے عمران خان کے نظریے کے ساتھ کھڑے ہیں۔

لاہور میں تقریب سے خطاب کرتے ہوئے وزیر توانائی پنجاب ڈاکٹر اختر ملک نے کہا کہ اس وقت ملک کی بھاگ ڈور ایک ایماندار شخص کے ہاتھ میں ہے۔

پنجاب ڈاکٹر اختر ملک نے کہا کہ جب تک دم ہے عمران خان کے نظریے کے ساتھ کھڑے ہیں، ہم ان کے ساتھ اس لیے کھڑے ہیں کہ کہ وہ ایک ایماندار شخص ہیں۔

انہوں نے کہا کہ عمران خان نے نہ تو کوئی فیکٹری اور جائیداد بنانی ہے اور نہ ہی انہیں اپنے بچوں کی فیسوں کی فکر ہے ، اس وقت ملک کو صرف عمران خان کرپشن کی دلدل سے نکال سکتے ہیں۔

وزیر توانائی پنجاب نے کہا کہ عمران خان نے تو یہاں تک کہہ دیا ہے کہ میرے مرنے کے بعد میری تمام جائیداد شوکت خانم ہسپتال کی ملکیت ہوگی۔

انہوں نے کہا کہ جس ملک اور قوم کو عمران خان جیسا لیڈر ملے اسے دوسری طرف دیکھنے کی ضرورت نہیں، عمران خان کی مخالفت میں  70 سال کا گند ایک سٹیج پر اکٹھا ہو گیا ہے۔

انہوں نے مزید کہا کہ یہ پاکستان کے استحکام کی جنگ ہے، یہ ملک ہے تو ہم ہیں۔