ترین گروپ کے ممبر صوبائی اسمبلی خرم لغاری نے وزیراعلی پنجاب عثمان بزدار کے حق میں بڑا بیان دے دیا۔

دو روز قبل پی ٹی آئی کے سینئر رہنما علیم خان نے ساتھیوں سمیت جہانگیر ترین گروپ میں شمولیت کا اعلان کیا اور اس موقع پر ایک مشاورتی اجلاس ہوا جس میں پنجاب میں وزارت اعلیٰ کی تبدیلی کے حوالے سے بات ہوئی۔

ترین گروپ نے یک زبان ہوکر مائنس بزدار کا مطالبہ کرتے ہوئے حکومتی ارکان سے عثمان بزدار کے استعفیٰ کے بعد ہی بات کرنے کا اعلان کیا تاہم آج ترین گروپ کے ایک رکن نے یوٹرن لے لیا۔

یہ بھی پڑھیں؛ جہانگیر ترین گروپ نے مائنس بزدار کے لیے چوہدری پرویز الہیٰ سے مدد مانگ لی

جہانگیر ترین گروپ کے اہم رکن خرم لغاری اپنے ہی ساتھیوں  پر برس پڑے۔ انہوں نے کہا کہ مائنس بزدار کی بات کسی ایک شخص کی سوچ ہو سکتی ہے یہ گروپ کا فیصلہ نہیں تھا ، عثمان بزدار ہمارے وزیراعلی ہیں اور بلوچ سردار ہیں۔

خرم لغاری کا کہنا تھا کہ ہم اس موقع پر وزیراعلی کو اکیلا نہیں چھوڑ سکتے اور نہ چھوڑیں گے ، وزیراعظم عمران خان نے ہی وزیراعلی عثمان بزدار کا فیصلہ کیا تھا اور ہم ان کے فیصلے کا احترام کرتے ہیں۔

انہوں نے کہا کہ پنجاب کے وزیراعلی عثمان بزدار ہی رہیں گے اور یہ اسمبلی چلے گی ، جو مائنس بزدار کی بات کررہے ہیں وہ لوگ انہیں کی کابینہ کا حصہ ہیں اور وہ بزدار کا ہی قلم استعمال کرکے عہدیدار بنیں ہیں اور جھنڈے لہراتی گاڑیوں پر گھومتے ہیں۔

یہ بھی پڑھیں؛ جہانگیر ترین گروپ کا اجلاس، پنجاب میں تبدیلی کی صورت میں وزیر اعلی کے نام پر غور

خرم لغاری کا مزید کہنا تھا کہ ہر انسان کا اپنا گروپ ہوتا ہے مگر جماعت تحریک انصاف ہے تھوڑا خیال کریں اپنی اسمبلی بچائیں۔

واضح رہے وزیراعلیٰ پنجاب کی تبدیلی کے حوالے سے علیم خان لندن پہنچ گئے ہیں جہاں وہ جہانگیر ترین سے ملاقات کریں گے جس کے بعد وہ سابق وزیراعظم نوازشریف سے ملاقات کریں گے جس میں موجودہ سیاسی صورتحال پر تبادلہ خیال کیا جائے گا۔