ایڈمنسٹریٹر کراچی مرتضی وہاب نے کہا ہے کہ جو کہتے تھے گھبرانا نہیں ہے وہ خود گھبرانا شروع ہوگئے ہیں۔

کمیٹی روم سندھ اسمبلی میں مرتضی وہاب نے پریس کانفرنس کرتے ہوئے کہا کہ پاکستان تحریک انصاف تحریک انتشار ہے ، یہ لوگوں کو سہانے خواب دکھا کر سلیکٹ ہوگئے تھے۔

مرتضی وہاب نے کہا کہ ساڑھے تین سال میں تحریک انصاف نے پاکستانیوں کو انصاف نہیں دیا، جو کہتے تھے گھبرانا نہیں ہے وہ گھبرانا شروع ہوگئے ہیں۔

انہوں نے کہا کہ بلاول کے مارچ کی پورے پاکستان میں پزیرائی ہوئی تو حکومت بوکھلاہٹ کا شکار ہو گئی، اپوزیشن نے اپنا آئینی حق استعمال کرتے ہوئے تحریک عدم اعتماد جمع کرائی۔

ایڈمنسٹریٹر کراچی کا کہنا تھا کہ اسپیکر نے آئین کی پاسداری کا حلف لیا ہے ، آئین کے مطابق اسپیکر کو چودہ روز کے اندر اجلاس بلانا ہے۔

انہوں نے کہا کہ ان کے پاس کوئی راستہ نہیں بچا تو اب سندھ حکومت کو ڈرانے کی کوشش کررہے ہیں ، یہ کسی اور کو ڈرائیں ہم نے ضیا، مشرف کا سامنا کیا ہے۔

 مرتضی وہاب نے کہا کہ اب لوگ ان کے فلسفے سے متاثر نہیں اور وکلا برادری کا شکریہ کہ انہوں نے شیخ رشید کے بیان کی مزمت کی۔

ایڈمنسٹریٹر کراچی نے کہا کہ جو ضیا کی آمریت سے نہیں ڈرے وہ کیسے ڈر جائیں گے، کیا یہ گورنر راج کے قابل ہے، ان کی گھبراہٹ کا وقت ہوچکا ہے ، ہم ڈرنے والے نہیں۔

انہوں نے کہا کہ  شہرمیں ترقی ہونی چاہیے، تمام سیاسی جماعتوں کے ساتھ مذاکرات جاری ہیں جبکہ کارکنوں کے باہمی مشورے سے فیصلے ہوگئے۔

ان کا کہنا تھا کہ سیاسی میچورٹی کا مظاہرہ کرنا ہوگا ، پچھلے تین دہائیوں سے ایم کیوایم مقبؤل سیاسی جماعت بن کر ابھری ہے۔

ایڈمنسٹریٹر کراچی نے مزید کہا کہ یہ حکومت رہے گی نہیں ، چلی جائے گی کیونکہ ان کے لوگوں نے کشتی سے چھلانگ لگانا شروع کر دی ہیں۔