بھارتی کرکٹ بورڈ نے آئی پی ایل کے اگلے 5 سیزن کے لئے نشریاتی حقوق فروخت کرنے کا ٹینڈر جاری کر دیا.

گزشتہ روز بھارتی کرکٹ بورڈ نے اپنے برانڈ آئی پی ایل کے 5 سیزن 2023-2027 کے لئے میڈیا رائٹس ٹینڈر جاری کئے اور امید کی جارہی ہے کہ یہ نشریاتی حقوق 50 ہزار کروڑ میں فروخت ہو سکتے ہیں۔

بی سی سی آئی کے سیکریٹری جے شاہ کا کہنا ہےکہ بورڈ آئی پی ایل کی تاریخ میں پہلی مرتبہ ای نیلامی کا اہتمام کر رہا ہے۔

جے شاہ نے کہا کہ رواں سیزن میں دو نئی فرنچائز کا مطلب زیادہ میچز ، زیادہ دلچسپی اور زیادہ وینیوز سے آئی پی ایل ترقی کی جانب بڑھ رہی ہے۔

لکھنؤ سپر جائنٹس اور گجرات ٹائٹینز کے آنے سے آئی پی ایل کے میچز کی تعداد 60 سے بڑھ کر 74 ہو گئی ہے۔

جے شاہ کا مزید کہنا تھا کہ دلچسپی رکھنے والی کمپنیوں میں بھی اب زیادہ مسابقت کی جنگ ہو گی جس کا فائدہ بورڈ کو ہو گا اور امید ہے کہ نشریاتی حقوق 50 ہزار کروڑ میں جا سکتے ہیں۔

آئی پی ایل کے نشریاتی حقوق کے لئے درخواست جمع کرانے کی آخری تاریخ 10 مئی ہے جبکہ نیلامی 12 جون تک متوقع ہے۔