پاکستان کی معروف اداکارہ سجل علی اور احد رضا میر کی طلاق کے معاملے کی حقیقت کا ایک رخ سامنے آگیا۔

پاکستان شوبز انڈسٹری کی اداکارہ فریال محمود نے اداکارہ سجل اور اداکار احد کے رشتے کے بارے میں بتا دیا۔

 اداکارہ فریال محمود نے فوٹو اینڈ ویڈیو شئیرنگ ایپ انسٹاگرام پر ایک تصویر پوسٹ کی ہے۔

اداکارہ فریال کی جانب سے انسٹاگرام پر پوسٹ کی جانے والی تصور میں اداکارہ سجل کو اپنے شوہر اداکار احد رضا میر کے ہمراہ بہت خوشگوار موڈ میں دیکھا جا سکتا ہے۔

 انسٹاگرام پر اداکارہ فریال نے پوسٹ کی جانے والی تصویر کی کیپشن میں لکھا کہ ایک بار پھر سجل اور احد ایک ساتھ۔

یاد رہے اس سے قبل مایا خان کی جانب سے انسٹاگرام اسٹوریز میں سجل علی اور احد رضا میر کی طلاق کے معاملے پر افواہیں پھیلانے والے افراد کو کہا گیا تھا کہ دونوں اداکاروں نے اپنا گھر اور پیار کھو دیا ہے، انہیں زندگی کے مشکل وقت میں تنہا چھوڑ دیا جائے۔

انہوں نے لکھا تھا کہ دونوں اپنی محبت کی امید سے بھی محروم ہوگئے ہیں مگر لوگ ان کے حوالے سے افواہیں پھیلانے سے باز نہیں آ رہے۔

ٹی وی میزبان نے لوگوں سے اپیل کرتے ہوئے کہا تھا کہ وہ سجل علی اور احد رضا کی تصاویر شیئر کرکے ان کے مشکل وقت کو مزید مشکل نہ بنائیں۔

مایا خان نے ایک ویڈیو بھی شئیر کی جس میں وہ لوگوں کو اپیل کر رہی ہیں کہ ان دونوں کے حوالے سے افواہیں پھیلانا بند کریں۔

انہوں نے کہا تھا کہ لوگوں کو اپنی زندگی کے مسائل کا کچھ علم نہیں ہوتا مگر دوسروں کی زندگی میں مداخلت کرنا اپنا حق سمجھتے ہیں۔

علاوہ ازیں اداکار اظفر رحمٰن نے بھی لوگوں سے اپیل کی تھی کہ وہ اس جوڑے کے حوالے سے افواہیں نہ پھیلائیں۔

انہوں نے اپنی اسٹوری میں لکھا کہ جب میاں اور بیوی دونوں معروف شخصیات ہوں تو ان کی طلاق مزید مشکل بن جاتی ہے۔

انہوں نے سجل علی اور احد رضا میر کا نام لکھے بغیر مداحوں کو اپیل کی تھی کہ وہ طلاق کے عمل سے گزرنے والے جوڑے کی پرائیویسی کا خیال رکھتے ہوئے صبر کا دامن نہ چھوڑیں۔

واضح رہے کہ سجل اور احد رضا کی طلاق کی افواہیں اس وقت پھیلینا شروع ہوئیں جب 22 مارچ کو سجل علی نے انسٹاگرام پر اپنے نام سے احد رضا میر کا نام ہٹایا تھا۔

اس سے قبل بھی دونوں کے درمیان علیحدگی اور طلاق کی خبریں سامنے آتی رہی تھیں مگر گزشتہ 6 ماہ سے دونوں کی جانب سے کوئی وضاحت نہیں کی گئی تھی۔

سجل علی اور احد رضا میر نے مارچ 2020 میں شادی کی تھی تاہم ان کے درمیان شادی کے سوا سال بعد ہی اختلافات کی خبریں آنا شروع ہو گئی تھیں اور اب شادی کے دو سال مکمل ہونے پر ان کی طلاق کی خبریں پھیل رہی ہیں۔