آئی جی پنجاب راؤ سردار علی خان نے کہا ہے کہ شاہرات پر ڈیوٹی سر انجام دینے والے ٹریفک وارڈنز اور پولیس اہلکار محکمہ کا حقیقی چہرہ ہیں۔

راؤ سردار علی خان نے لاہور میں پی ایس ایل 7 کے میچز کے دوران بہترین ٹریفک مینجمنٹ اور ٹریفک روانی برقرار رکھنے پر ٹریفک وارڈنز اور پولیس اہلکار کو شاباشی دی ہے۔

آئی جی پنجاب نے سی ٹی او لاہور منتظر مہدی اور ٹریفک وارڈنز کی محنت اور کارکردگی کو بھی سراہا۔

راؤ سردار علی نے کہا کہ افسران کے ساتھ ساتھ تمام ٹریفک وارڈنز اور لیڈی اہلکاروں نے بھی احسن انداز میں فرائض سر انجام دئیے۔

آئی جی پنجاب نے سی ٹی او لاہور منتظر مہدی کو بہترین کام کرنے پر تعریفی سرٹیفکیٹ بھی دیا۔

انہوں نے کہا کہ شاہرات پر ڈیوٹی سر انجام دینے والے ٹریفک وارڈنز اور پولیس اہلکار محکمہ کا حقیقی چہرہ ہیں، بین الاقوامی سطح کے بڑے کرکٹ ایونٹ کے دوران ٹریفک کی روانی کو برقرار رکھنا قابل ستائش ہے۔

راؤ سردار علی نے کہا کہ لاہور ٹریفک پولیس کے افسران و اہلکار اسی جذبے اور فرض شناسی کے ساتھ  ٹریفک روانی برقرار رکھتے ہوئے عوام کی خدمت سر انجام دیں۔

آئی جی پنجاب نے مزید کہا کہ ہارس اینڈ کیٹل شو اور پاک آسٹریلیا سیریز کے لاہور میں میچ کے لیے بھی جامع حکمت عملی کے تحت ٹریفک انتظامات کیے جائیں۔