قائد ملت جعفریہ پاکستان علامہ سید ساجد علی نقوی نے سانحہ پشاور پر تین دن سوگ اور اتوار کے روز ملک گیر احتجاج کا اعلان کردیا ہے۔

تفصیلات کے مطابق علامہ سید ساجد علی نقوی نے سانحہ پشاور قصہ خوانی جامع مسجد میں خود کش حملے کی شدید الفاظ میں مذمت کی ہے، ان کا کہنا ہے کہ امام جمعہ سمیت درجنوں افراد کی شہادت سیکیورٹی اداروں کی کارکردگی پر سوالیہ نشان ہے،۔

علامہ ساجد نقوی نے سانحہ پشاور کی غیر جانبدارانہ و شفاف تحقیقات کا مطالبہ کردیا، انہوں نے کہا کہ واقعے کی غیر جانبدار تحقیقات اور مجرموں کی تشخیص کر کے قانون کے حوالے کیا جائے، مضبوط پراسیکوشن کے ذریعے مجرموں کو کیفرو کر دار تک پہنچایا جائے۔

انہوں نے کوئٹہ میں ہونے والی دہشتگردی کے مجرمان کو گرفتار کرنے کا بھی مطالبہ کردیا، ان کا کہنا تھا کہ حکمران شہریوں کو تحفظ فراہم کرنے میں مکمل طورپر ناکام نظر آتی ہے، غم کی اس گھڑی میں شہداء کے لواحقین کے ساتھ برابر کے شریک ہیں۔

قائد ملت جعفریہ پاکستان علامہ سید ساجد علی نقوی کا مزید کہنا تھا کہ دہشت گردوں کے سہولت کاروں کی شناسائی کر کے قانون کے شکنجے میں جکڑا جائے، سانحہ پشاور کے زخمیوں کوتمام طبی سہولیات فراہم کی جائیں۔

واضح رہے کہ پشاور کے علاقے کوچہ رسالدار میں مسجد میں دھماکا ہوا جس میں 50 افراد شہید جبکہ 100 سے زائد زخمی ہو گئے ہیں۔

ذرائع کے مطابق پشاور کے علاقے کوچہ رسالدار میں دھماکا مسجد کے اندر نماز شروع ہونے سے کچھ دیر قبل ہوا جس کے باعث متعدد افراد زخمی ہو گئے ہیں، دھماکے کے وقت مسجد میں نمازیوں کی بڑی تعداد موجود تھی۔

ذرائع کا کہنا ہے کہ پولیس کی بھاری نفری موقع پر پہنچ گئی ہے جبکہ علاقے کو گھیرے میں لے لیا گیا ہے۔

اس کے علاوہ ریسکیو کی ٹیموں نے امدادی کارروائی شروع کردی ہیں، ریسکیو 1122 کی 15 ایمبولینسز موقعے پر پہنچ گئیں۔

ریسکیو ذرائع کا کہنا ہے کہ 100 کے قریب زخمیوں کو طبی امداد فراہم کرتے ہوئے اسپتال منتقل کر رہے ہیں۔

پولیس کا کہنا ہے کہ دھماکے کی توعیت کا تعین کیا جا رہا ہے۔

لیڈی ریڈنگ اسپتال میں ایمرجنسی نافذ کر دی گئی ہے۔

ذرائع کا کہنا ہے کہ زخمیوں میں بیشتر شدید زخمی ہیں، زخمیوں کی تعداد میں اضافے کا خدشہ ہے جس کے باعث ایل آر ایچ میں ریڈ الرٹ اضافی طبی عملے کو بلایا گیا ہے۔

ذرائع کا کہنا ہے کہ دھماکے سے پہلے حملہ آور نے پولیس پر فائرنگ کی، بعد ازاں حملہ آور نے خود کو اڑا لیا۔