حکومتِ پاکستان نے رواں برس رمضان کے لیے زکوٰۃ کا نصاب مقرر کردیا ہے۔

زکوٰۃ کا نصاب 88 ہزار 927 روپے مقرر کیا گیا ہے۔

یعنی یکم رمضان کو آپ کے بینک اکاونٹس سے 88 ہزار 927 روپے یا اس سے زائد رقم پر از خود زکوٰۃ کی رقم منہا کرلی جائے گی۔

وزارت مذہبی امور کی مشاورت کے بعد اسٹیٹ بینک نے 52 تولے چاندی کی قیمت کے برابر زکوٰۃ کا اعلان کر دیا ہے۔

بینکوں میں 88 ہزار 927 روپے رکھنے والے صارفین سے ڈھائی فیصد کے حساب سے زکوٰۃ کی کٹوتی کی جائے گی۔

مرکزی بینک کے مطابق زکوٰة صرف سیونگ اکاؤنٹس سے ہی منہا کی جائے گی، کرنٹ اکاؤنٹ اور غیر ملکی کرنسی اکاؤنٹس سے زکوٰة کی رقم منہا نہیں ہوگی۔

زکوٰۃ نصاب کیا ہے؟

جامعۃ العلوم الاسلامیہ کے مطابق اگر کسی کے پاس صرف سونا ہو تو ساڑھے سات تولہ سونا، اور صرف چاندی ہو تو  ساڑھے باون تولہ چاندی، یا دونوں میں سے کسی ایک کی مالیت کے برابر نقدی  یا سامانِ تجارت ہو،  یا یہ سب ملا کر یا ان میں سے بعض ملا کر مجموعی مالیت چاندی کے نصاب کے برابر بنتی ہو تو ایسے  شخص پر سال پورا ہونے پر قابلِ زکوٰۃ مال کی ڈھائی فیصد زکوٰۃ ادا کرنا لازم ہے۔

واضح رہے کہ زکوٰۃ کا مدار صرف ساڑھے سات تولہ سونے پر اس وقت ہے کہ جب کسی اور جنس میں سے کچھ پاس نہ ہو، لیکن اگر سونے کے ساتھ ساتھ کچھ اور مالیت بھی ہے تو پھر زکوٰۃ کی فرضیت کا مدار ساڑھے باون تولہ چاندی پرہوگا۔