سندھ ہائیکورٹ نے ایس بی سی اے کو غیر قانونی تعمیر ہونے والی عمارت کے خلاف کارروائی کا حکم دے دیا۔ 

تفصیلات کے مطابق کراچی میں گولی مار پیتل گلی کے علاقے میں غیر قانونی تعمیرات کے خلاف درخواست کی سماعت کے دوران غیر قانونی تعمیرات کی روک تھام کرنے میں ناکامی پر عدالت نے ایس بی سی اے اور دیگر اداروں پر برہمی کا اظہار کیا۔

سندھ ہائی کورٹ نے غیر قانونی تعمیرات سے متعلق بڑا حکم نامہ جاری کرتے ہوئے فوری طور پرغیر قانونی تعمیرات روک دیں۔

ایس بی سی اے حکام کو غیر قانونی تعمیر ہونے والی عمارت کے خلاف کارروائی کا حکم دیتے عدالت نے سب رجسٹرار کو عمارت میں سب لیز دینے سے روک دیا۔

سندھ ہائی کورٹ نے گیس، بجلی اور پانی کے کنکشنز بھی منقطع کرنے کا حکم دیا۔

عدالت نے کے الیکٹرک، ایس ایس جی سی اور دیگر کو حکم دیا کہ اگر عمارت میں یوٹیلٹیز کے کنکشن فراہم نہیں کیے گئے تو عمل روک دیا جائے۔

عدالت نے ایس بی سی اے اور دیگر سے 6 ہفتوں میں رپورٹ طلب کرلی۔

شجاعت علی درخواست گزار نے عدالت کو بتایا کہ پیتل گلی پلاٹ نمبر 11/1 سو کوارٹرز میں غیر قانونی طور پر پورشنز بنانے جارہے ہیں۔ متعلقہ اداروں کو غیر قانونی تعمیرات کے خلاف درخواستیں دیں مگر کارروائی نہیں کی۔