حلیم عادل شیخ نے کہا ہے کہ وزیر اعلیٰ کی پھرتیاں صرف کرپشن اور فنڈز پر نظرآتی ہیں۔

اپوزیشن لیڈر سندھ اسمبلی حلیم عادل شیخ نے کہا ہے کہ وزیر اعلیٰ سندھ کے گاؤں بھان سعید آباد میں دو ماہ سے پینے کا پانی ناپید ہوچکا ہے۔

انہوں نے کہا کہ نالائق اعلیٰ کے حلقے میں پی پی کے لوگ بھی سراپا احتجاج ہیں، وزیر اعلیٰ کو اپنے گاؤں میں پانی دینے کے لیے بھی بلاول کی اجازت چاہیے؟

حلیم عادل شیخ نے کہا ہے کہ بھان سعید آباد کو بھی وزیراعلیٰ نے تھرپارکر اور کاچھو بنا دیا ہے، بھان سعید آباد کے لوگ ٹینکرز سے پانی خرید رہے ہیں، بھان سعید آباد کی عوام وزیراعلیٰ اور نمائندوں کو ڈھونڈ رہی ہے۔

اپوزیشن لیڈر سندھ اسمبلی نے کہا ہے کہ وزیر اعلیٰ کی پھرتیاں صرف کرپشن اور فنڈز پر نظرآتی ہیں، ایک نالائق اور غلام شخص کو سندھ کا وزیراعلیٰ بنادیا گیا ہے، وزیر اعلیٰ سندھ ایم کیو ایم سے سودے بازیاں کرتے تو نظرآتے ہیں مگر عوام کو پانی نہیں دے سکتے۔

انہوں نے کہا کہ ہر مرض اور مصیبت اس وقت نااہل حکومت کی وجہ سے سندھ میں ہے، وزیر اعلیٰ سندھ اداکاریوں سے فرصت پا کرعوام کے مسائل بھی دیکھیں۔