سندھ ہائی کورٹ نےحکم دیا کہ صوبے کے تمام اضلاع کے میڈیکل سپرینٹنڈنٹ اور ڈی ایچ اوز ایمرجنسی میں عوام کو ایمبولینس سروس فراہم کریں۔ 

سندھ ہائیکورٹ میں صوبہ سندھ میں سرکاری سطح پر ایمبولینس سروس نا ہونے کے خلاف درخواست کی سماعت ہوئی۔

دورانِ سماعت عدالت نے کیس میں ریمارکس دیے کہ ایمر جنسی کی صورت میں شہری کس طرح ایمبولینس سروس استعمال کرتے ہیں طریقہ کار بتایا جائے۔

سندھ ہائی کورٹ نے ایمرجنسی کالز سے متعلق ڈیٹا بھی طلب کرلیا۔

سماعت کے دوران عدالت نے ریمارکس دیے کہ کتنے وقت میں ضرورت مند مریضوں کو ایمرجنسی کی صورت میں ایمبولینس سروس فراہم کردی جاتی ہے۔ تمام اضلاع کے میڈیکل سپرینٹنڈنٹ اور ڈی ایچ اوز ایمرجنسی میں عوام کو ایمبولینس سروس فراہم کریں۔

سندھ ہائی کورٹ نے درخواست کی مزید سماعت 14 اپریل تک ملتوی کردی۔

درخواست مظہر علی شیخ ایڈووکیٹ کی جانب سے دائر کی گئی ہے جس میں عدالت کے سامنے مؤقف پیش کیا گیا کہ سندھ میں سرکاری سطح پر ایمبولینس سروس موجود نہیں ہے۔ دور دراز علاقوں سے آنے والے مریض ایمبولینس سروس نا ہونے کی وجہ سے انتقال کرجاتے ہیں۔