ترجمان پی ڈی ایم نے کہا ہے کہ قوم کو پاکستانی ہٹلر عمران نیازی سے نجات مل گئی ہے۔

ترجمان پی ڈی ایم حافظ حمد اللہ نے اپنے ایک بیان میں کہا کہ عمران نیازی اپنی کرسی بچاو میں آئین قانون جمہوریت عدالت اور ریاست سے لڑرہا تھا۔

انہوں نے کہا کہ دوسری طرف پی ڈی ایم اور متحدہ اپوزیشن آئین، قانون، جمہوریت، عدالت اور ریاست کی تحفظ کے لئے لڑ رہی تھی۔

ترجمان پی ڈی ایم کا کہنا تھا کہ آخر کار آئین قانون جمہوریت عدالت اور ریاست کی جیت ہوئی، آئین کی بالادستی پر پی ڈی ایم اور متحدہ اپوزیشن قیادت مبارکباد کے مستحق ہے۔

حافظ حمد اللہ کا یہ بھی کہنا تھا کہ قوم کو پاکستانی ہٹلر عمران نیازی سے نجات مل گئی ہے، ہندوستانی قوم ہمت کرے اپنے ہٹلر نریندر مودی سےنجات حاصل کرے۔

ترجمان پی ڈی ایم حافظ حمد اللہ کا مزید کہنا تھا کہ غیر متوازن غیر جمہوری اور  غیر آئینی سویلین ڈکٹیٹر سے قوم کی جان چھوٹ گئی ہے۔