عدالت نے سوشل میڈیا پرفوج کے خلاف مہم چلانے والے ملزم کا 2 روزہ جسمانی ریمانڈ منظورکر لیا۔

تفصیلات کے مطابق ضلع کچہری لاہورمیں سوشل میڈیا پر فوج کے خلاف مہم چلانے والے ملزم کا 2 روزہ جسمانی ریمانڈ منظورکرتے ہوئے عدالت نے ملزم شفقت مسعود کو 15 اپریل کو دوبارہ پیش کرنے کا حکم دیا۔

جوڈیشل مجسٹریٹ لاہور نے ملزم کے جسمانی ریمانڈ کی درخواست پر سماعت کی۔

ایف آئی حکام کی جانب سے عدالت کو بتایا گیا کہ ملزم نے اپنے ٹویٹراکاؤنٹ سے پاک آرمی کے خلاف مہم چلائی۔ ملزم نے خصوصاً چیف آف آرمی سٹاف جنرل قمر جاوید باجوہ کے خلاف مہم چلائی۔

ایف آئی اے حکام کا کہنا تھا کہ ملزم سے اس کے سوشل میڈیا اکاؤنٹس کا پتا کرنا ہے، عدالت سے استدعا ہے کہ ملزم شفقت مسعود کا 14 روزہ جسمانی ریمانڈ دیا جائے۔

دوسری جانب پاک فوج، اہم شخصیات اور عدلیہ کے خلاف سوشل میڈیا پر ٹرینڈ مہم بنانے کے معاملے میں ایف آئی اے کے کاونٹر ٹیرازم ڈیپارٹمنٹ کی مختلف شہروں میں کاروائیاں جاری ہیں۔

ایف آئی اے کے ذرائع کے مطابق بڑے پیمانے پر لسٹیں بنا لی گئی ہیں۔ ابتدائی طور پرلاہور، فیصل آباد اور دیگر شہروں سے 10 کے قریب افراد کو گرفتار کیا جا چکا ہے۔

ذرائع کا کہنا ہے کہ ہیڈ آفس اسلام آباد سے گرین سگنل ملنے پر مزید گرفتاریاں ہوں گی۔ ‏نفرت انگیز مواد پھیلانے والے 7 ملزمان کو گرفتار کیا جا چکا ہے۔

گرفتار ملزمان میں سے 2 کولاہور،2 فیصل آباد، 2 ملتان اور 1 کو گوجرانوالہ سے گرفتار کیا گیاہے۔