عمران خان کی سابقہ اہلیہ ریحام خان نے پی ٹی آئی کی حمایت کرنیوالے پاکستان شوبز انڈسٹری کے اسٹارز کو ’ممی ڈیڈی فنکار‘ کا لقب دیا ہے۔

 ریحام خان نے پی ٹی آئی کے کراچی جلسے میں فنکاروں کی بھرپور شرکت پر اپنا ردعمل دیتے ہوئے ٹوئٹر پیغام میں لکھاکہ جو ممی ڈیڈی اداکار تحریک انصاف کا اقتدار جانے پر احتجاج کر رہے ہیں، کاش کشمیر پر بھی اتنا ہی احتجاج کیا ہوتا تو کیا ہی بات تھی۔

جو ممی ڈیڈی اداکار تحریک انصاف کا اقتدار جانے پر احتجاج کر رہے ہیں کاش کشمیر پر بھی اتنا ہی احتجاج کیا ہوتا تو کیا ہی بات تھی ۔

— Reham Khan (@RehamKhan1) April 17, 2022

مشی خان کا ریحام کو کرارا جواب

ریحام خان کی اس ٹوئٹ پر شوبز انڈسٹری کی سینئیر اداکارہ اور میزبان مشی خان نے انہیں سخت جواب دیتے ہوئے ایک ویڈیو شیئر کی۔

ویڈیو میں مشی خان نے کہا کہ اگر فنکاروں نے کشمیر کے لیے احتجاج نہیں کیا تو آپ کرلیتی؟ آپ کو کس بات کا انتظار تھا۔ آپ ہر دفعہ ہمیں ڈکٹیشن دیتی رہتی ہیں لیکن جب کشمیر کا مسئلہ اٹھا تو اس وقت آپ کہیں بی بی سی پر رپورٹنگ تو کہیں مغربی طرز زندگی جینے میں مصروف تھیں۔

مشی خان نے کہا کہ اب آپ نے سر پر دوپٹہ لے لیا تو آپ کو کشمیر یاد آگیا لیکن ہمیں کشمیر ہمیشہ یاد ہے اور ہم کشمیر کے لیے آواز بھی اٹھاتے ہیں۔

ریحام خان کو جواب دیتے ہوئے مشی نے کہاکہ ہمیں پورا حق ہے کہ ہم جسے مرضی چاہیں اسے سپورٹ کریں، آپ جس طرح بغیر اجازت موبائل فون لے کر اسمبلی پہنچ کر الٹی سیدھی ویڈیوز بناتی ہیں وہ بنائیں اورہمیں اپنا کام کرنے دیں ۔

مشی خان نے اپنی ٹوئٹ پر شئیر کردہ ویڈیو کے آخر میں کہاکہ  ہمیں لیکچر دینے کے بجائے پہلے خود کو لیکچر دیں، ہم ہمیشہ عمران خان کو ہی سپورٹ کریں گے۔