سعودی حکام کی حال ہی میں بالی ووڈ کے سپراسٹارز سے ہونے والی ملاقات کی وجہ سامنے آگئی۔

سعودی میڈیا کا اس حوالے سے کہنا ہےکہ سعودی وزیر ثقافت شہزادہ بدر جو کہ سعودی فلم کمیشن کے سربراہ بھی ہیں، انہوں نے بھارت کے تین روزہ دورے میں سپر اسٹار شاہ رخ خان، دبنگ سلمان خان، چھوٹے نواب سیف علی خان،خطروں کے کھلاڑی اکشے کمار و دیگر اداکاروں سے ملاقاتیں کیں۔

سعودی میڈیا کے مطابق بالی ووڈ کے سپر اسٹارز سے ان ملاقاتوں کا مقصد بھارتی فلم انڈسٹری کے فلم سازوں اور اداکاروں کے تجربے سے فائدہ اٹھانا اور ان کی ماہرانہ رائے کی روشنی میں سعودی فلم انڈسٹری کو فروغ دینا ہے۔

دوسری جانب شہزادہ بدر بن عبداللہ نے کہا کہ ایسے عالم میں جبکہ پوری دنیا مختلف حوالوں سے رابطوں، رشتوں میں جڑ رہی ہے، بھارت کا دورہ فلمی صنعت میں سعودی عرب کی حیثیت کو بہتر بنانے کی ایک کوشش تھی۔

اس حوالے سے مزید بتایا گیا کہ سعودی عرب اپنے ملک میں فلمی صنعت کو پروان چڑھانا چاہتا ہے اور اس مقصد کیلئے ٹریننگ پروگرام شروع کیے جائیں گے اور بھارتی فلمی شخصیات کو ان میں مدعو کیا جائے گا۔

واضح رہےکہ اب سعودی عرب تیل سے آگے کی دنیا کے بارے میں سوچ رہا ہے، اقتصادیات کی نئی راہوں کو تلاش کررہا ہے۔

سعودی عرب سیاحت اور تیل کے ساتھ اب نئے میدانوں کو ہدف بنا رہا ہے جس کے تحت اب  بھارت کی بالی ووڈ کے لیے بھی اپنے دروازے کھولنے کا فیصلہ کیا ہے۔

بالی ووڈ کو دنیا کی سب سے بڑی فلمی صنعت مانا جاتا ہے جس کی فلموں کی شوٹنگ اب امریکہ اور کینیڈا کے ساتھ ساتھ عالم عرب میں بھی ہورہی ہیں ۔