ڈاکٹر فردوس عاشق اعوان نے کہا ہے کہ جامعہ کراچی دھماکے میں قیمتی جانوں کے ضیاع پر دلی دکھ ہے۔

سماجی رابطے کی ویب سائٹ ٹوئٹر پر اپنے جاری کردہ ٹوئٹ پیغام میں  فردوس عاشق اعوان لکھتی ہیں کہ جامعہ کراچی دھماکے میں قیمتی جانوں کے ضیاع پر دلی دکھ ،درد اور افسوس ہوا ہے۔

جامعہ کراچی دھماکے میں قیمتی جانوں کے ضیاع پر دلی دکھ درد اور افسوس ہوا۔غم کی اس گھڑی میں لواحقین کے ساتھ اظہار تعزیت کرتی ہوں اور انکے دکھ درد میں برابر کی شریک ہوں۔

— Dr. Firdous Ashiq Awan (@Dr_FirdousPTI) April 26, 2022

جاری کردہ ٹوئٹ میں فردوس عاشق لکھتی ہیں کہ غم کی اس گھڑی میں لواحقین کے ساتھ اظہار تعزیت کرتی ہوں اور انکے دکھ درد میں برابر کی شریک ہوں۔

جامعہ کراچی میں غیر ملکی اساتذہ کی وین میں دھماکے کے نتیجے میں 5 افراد جاں بحق جب کہ متعدد زخمی ہوگئے ہیں۔

کراچی یونیورسٹی کے کامرس ڈیپارٹمنٹ اور کنفیوشس انسٹی ٹیوٹ آف چائنیز لنگویج کے قریب کھڑی ایک وین میں اس وقت دھماکا ہوا جب وہآں بڑی تعداد میں طلبہ اور اساتذہ موجود تھے۔

دھماکے کی شدت اس قدر زیادہ تھی کہ ناصرف وین میں آگ بھڑک اٹھی بلکہ اطراف میں گھڑی گاڑیوں اور عمارتوں کے شیشے ٹوت گئے۔

دھماکے کے فوری بعد جامعہ کراچی میں سیکیورٹی پر مامور قانون نافذ کرنے والے ادارے کے اہلکار پہنچ گئے۔

دھماکے کے نتیجے میں زخمی ہونے والوں کو فوری طور پر قریبی اسپتال منتتقل کردیا گیا جہاں 5 افراد کے جاں بحق ہونے کی تصدیق کی گئی ہے۔ زخمیوں میں سے کئی کی حالت تشویشناک بتائی جارہی ہے، جس سے جانی نقصان میں مزید اضافے کا اندیشہ ظاہر کیا جارہا ہے۔

کراچی پولیس چیف غلام نبی میمن نے میڈیا سے بات کرتے ہوئےکہا کہ دھماکا خودکش ہوسکتا ہے اور اس میں برقع پوش خاتون ملوث ہوسکتی ہے، دھماکا تخریب کاری کا نتیجہ ہے، چینی اساتذہ کونشانہ بنایاگیا۔

وزیراعلیٰ سندھ مراد علی شاہ نے گاڑی میں دھماکے کا نوٹس لے لیا اور کمشنر کراچی سے تفصیلی رپورٹ طلب کرلی ہے۔

ڈی آئی جی ایسٹ مقدس حیدر نے میڈیا سے گفتگو کرتے ہوئے کہا ہے کہ دھماکا ایک بج کر 52 منٹ پر ہوا، دھماکے میں 5 افراد جاں بحق ہوئے جن میں تین غیر ملکی باشندے شامل ہیں۔

انہوں نے کہا کہ جاں بحق افراد میں غیر ملکیوں میں دو خاتون  ایک مرد شامل ہے، دھماکے کا تعین بم ڈسپوزیبل اسکاڈ نے کرنا ہے۔