ڈاکٹر طاہر القادری نے کہا ہے کہ سانحہ ماڈل ٹاؤن میں سزائے موت کے مرتکب ملزمان وزیر بنے بیٹھے ہیں۔

تفصیلات کے مطابق اسپیکر پنجاب اسمبلی چوہدری پرویزالہٰی نے پاکستان عوامی تحریک (پی اے ٹی) کے سربراہ علامہ ڈاکٹر طاہر القادری سے ٹیلیفونک رابطہ کیا ہے۔

ڈاکٹر طاہر القادری نے کہا ہے کہ پنجاب اسمبلی میں خون خرابے اور سانحہ ماڈل ٹاؤن کے ملزمان ایک ہی ہیں، سانحہ ماڈل ٹاؤن کے ملزمان کو سزا مل جاتی تو پنجاب اسمبلی کا واقعہ نہ ہوتا۔

انہوں نے کہا کہ سانحہ ماڈل ٹاؤن کے مرکزی ملزم کیپٹن (ر) عثمان کو رہا کر دیا گیا، سانحہ ماڈل میں سزائے موت کے مرتکب ملزمان وزیر بنے بیٹھے ہیں، ایک منٹ ضائع کیے بغیر سانحہ ماڈل ٹاؤن کے ملزمان کو سزا دی جائے۔

اسپیکر پنجاب اسمبلی چوہدری پرویزالہٰی نے کہا ہے کہ سانحہ ماڈل ٹاؤن میں جن کو پھانسی اور عمر قید کی سزا ہونی چاہیے تھی وہ وزیراعظم، وزیراعلیٰ اور وزیرداخلہ بنے بیٹھے ہیں۔

انہوں نے کہا کہ کیپٹن (ر) عثمان کی نگرانی میں ماڈل ٹاؤن کا آپریشن ہوا تھا، سانحہ ماڈل ٹاؤن کی سات سال کے بعد بھی غیر جانبدرانہ تفتیش نہیں ہوئی۔