انگلینڈ اور کینٹ کے سابق بلے باز روب کی کو انگلینڈ مینز کرکٹ کا منیجنگ ڈائریکٹر نامزد کر دیا گیا ہے۔

روبکی کی نامزدگی میں سابق کھلاڑی اینڈریو اسٹراس کا اہم کردار ہے جنہوں نے فروری میں ایشلے جائلز کی برطرفی کے بعد عبوری بنیادوں پر ٹیم کے کیمپ میں قدم رکھا تھا۔

واضح رہے کہ ایشلے جائلز کی دسمبر 2018 میں عہدے پر تعیناتی کی گئی تھی مگر آسٹریلیا کے خلاف ایشز سیریز میں 0-4 سے ہزیمت آمیز شکست کے بعد انہیں عہدے سے برطرف کر دیا گیا تھا۔

سابق کھلاڑی روبکی نے کہا کہ انگلش ٹیم کے لئے یہ کردار ادا کرنا میرے لئے ایک اعزاز کی بات ہے۔

روبکی نے مزید کہا کہ میں ٹیم میں اپنی موجودگی کے اثرات کو محسوس کراؤں گا اور ایسا بہت کم لوگوں میں ہوتا ہے۔

روبکی کے مطابق میرا اب ایک ہی نصب العین ہے کہ انگلش مینز کرکٹ ٹیم کو مستقبل میں عظیم دور کی شکل دینا چاہتا ہوں۔

انگلش کرکٹ بورڈ کے مطابق روبکی اپنی نامزدگی کے فوراً بعد اپنا کام شروع کر دیں گے ، ساتھ ہی وہ اسپورٹس چینل کے ساتھ اپنے کمنٹری معاہدے سے بھی دستبردار ہو جائیں گے۔

واضح رہے سابق کھلاڑی روبکی 2016 میں اپنی رٹائرمنٹ کے بعد سے کمنٹیٹر کے علاوہ انگلینڈ اینڈ ویلز کرکٹ بورڈ کی پرفارمنس کرکٹ کمیٹی کے رکن بھی رہے ہیں۔

روبکی ایسے وقت میں آئے ہیں جب انگلینڈ نئے ہیڈ کوچ اور ٹیسٹ کپتان کی تلاش میں ہے۔

واضح رہے کہ  کرس سلور ووڈ کو آسٹریلیا میں ایشز میں شکست کے بعد ہیڈ کوچ کے عہدے سے ہٹا دیا گیا تھا، جب کہ جو روٹ نے جمعہ کو اعلان کیا تھا کہ وہ کپتانی چھوڑ رہے ہیں۔