شمالی وزیرستان کے ضلع ایشام میں فورسز اور دہشت گردوں کے درمیان فائرنگ کے تبادلے میں سپاہی عصمت اللہ خان شہید ہوگئے۔

پاک فوج کے شعبہ تعلقات عامہ ( آئی ایس پی آر ) کے مطابق شمالی وزیرستان کے ضلع ایشام میں فورسز اور دہشت گردوں کے درمیان فائرنگ کا تبادلہ ہوا، فائرنگ کے تبادلے میں سپاہی عصمت اللہ خان شہید ہوگئے۔

ترجمان پاک فوج کے مطابق شمالی وزیرستان کے علاقے ایشام میں دہشت گردوں کو ختم کرنے کیلئے کلیئرنس آپریشن جاری ہے جب کہ دہشت گردوں کی جانب سے فائرنگ کا واقعہ 13 اپریل کو پیش آیا تھا۔

دوسری جانب وزیراعظم شہباز شریف نے شمالی وزیرستان کے ضلع ایشام میں فورسز پر دہشت گردوں کے حملے کی شدید مذمت کرتے ہوئے کہا کہ ارض پاک کا دفاع کرتے ہوئے میانوالی سے تعلق رکھنے والے 28 سالہ سپاہی عصمت اللہ شہید کو عظیم قربانی پر خراج عقیدت پیش کرتے ہیں۔

وزیراعظم کا کہنا تھا کہ شہداء کا لہو پوری قوم پر قرض ہے، ہم اس کی بوند بوند کا حساب لیں گے ، پوری قوم مادر وطن کے تحفظ و سلامتی کا فرض ادا کرنے والے بیٹوں کو سلام پیش کرتی ہے ۔

شہباز شریف نے کہا کہ ہمارے افسروں، جوانوں اور شہریوں کی شہادتیں دہشت گردی کے خلاف پاکستان کے پختہ عزم کا ثبوت ہے ، اللہ تعالیٰ سپاہی عصمت اللہ سمیت تمام شہدا کے درجات بلند فرمائے اور لواحقین کو صبر جمیل دے۔