بالی وُڈ کی مشہور اداکارہ کاجل اگروال کے ہاں ننھے مہمان کی آمد، بیٹے کی پیدائش ہوگئی۔

بھارتی میڈیا رپورٹ کے مطابق مشہور بھارتی اداکارہ کاجل اگروال کی بہن نے اداکارہ کے ہاں بیٹے کی پیدائش کی تصدیق کر دی۔

کاجل اگروال اور شوہر گوتم کیچلو کے ہاں ننھے مہمان کی آمد کی خوشخبری اداکارہ کی بہن نیشا اگروال نے بھارتی میڈیا کو انٹرویو دیتے ہوئے سنائی۔

نیشا نے میڈیا کو بتایا کہ کاجل اگروال کے ہاں منگل کی صبح پیارے سے بیٹے کی پیدائش ہوئی ہے۔

نیشا اگروال نے صبح انسٹاگرام پر اسٹوری شیئر کی تھی جس میں کہا گیا تھا کہ ’آج بہت ہی خوبصورت بہترین دن ہے اور میں بہت ہی خاص خبر مداحوں کو دینا چاہتی ہوں‘۔

واضح رہے کہ اداکارہ کاجل اگروال اور گوتم کیچلو نے جنوری 2022 میں حاملہ ہونے کا اعلان کیا تھا جب کہ دونوں نے اکتوبر 2020 میں شادی کی تھی۔

کاجل اگروال نے بالی وُڈ کے سپر اسٹار اجے دیوگن کے ساتھ مشہور فلم سنگھم میں کام کیا ہے ساتھ ہی وہ کئی فلموں میں اپنی بہترین اداکاری کے جوہر دکھا چکی ہیں۔