گردے جسم کے اہم ترین اعضاء ہیں جو فاسد مادوں کو پیشاب کی صورت میں جسم سے خارج کرتے ہیں، اس طرح یہ خون کے لئے کسی فلٹرکی طرح کا کام سرانجام دیتے ہیں۔

پانی کی مناسب مقدار اور متوازغذا گردوں کے افعال کی بہتر انداز میں انجام دہی کے لئے بہت ضروری ہے، ساتھ ہی گردوں کی صفائی اور صحت بڑھانے والے مشروبات کا استعمال ان کی کارکردگی کومزید بڑھاسکتا ہے۔

چقندر کا رس

گردوں کی صفائی کے لئے چقندر کے رس سے بہتر کوئی مشروب نہیں، اس میں موجود بیٹین نامی اینٹی آکسیڈینٹ پیشاب کی نالی کو صحت مند حالت میں رکھتا ہے، یہ حیرت انگیز طورپر کرین بیری کے جوس کی طرح پیشاب کی تیزابیت کو بڑھا کر مختلف بیکٹیریا کی نشوونما کی روک تھام کرتا ہے۔ ساتھ ہی یہ گردوں میں اسٹروئٹ اور کیلشیم کی تعمیرکو روکتا ہے جو پتھری بننے میں مدد فراہم کرتے ہیں۔

کروندا (کرین بیری) رس

گردوں اور پیشاب کی نالی سے جڑے کئی امراض میں کرین بیری کا رس کسی مسیحا سے کم نہیں، یہ رس مختلف بیکٹیریا کی افزائش کو روکنے میں معاون ثابت ہوتا ہے جو پیشاب کی نالی میں انفیکشن کا باعث بنتے ہیں۔ ایسا پیشاب کی تیزابیت بڑھنے سے ہوتا ہے۔

ملے جلے رس

پھلوں اور سبزیوں کے رس کو ملاکر پینا گردوں کو صاف کرنے کا ایک انتہائی مؤثر طریقہ ہے کیو نکہ یہ مشروب اینٹی آکسیڈینٹ، وٹامنز اور منلرز سے بھرپور ہوتے ہیں جو جسم سے فاسد مادوں کے اخراج میں میں مدد فراہم کرتے ہیں اس طرح جگر اور گردوں پر کام کا بوجھ کم پڑتا ہے۔

سیب، لیموں، ناشپاتی اورآڑو کو کھیرے،کیلے اور پالک کے ساتھ ملاکر بہترین مشروب تیار کیا جاسکتا ہے۔

لیموں کا رس

لیموں کے رس کا باقاعدگی سے استعمال گردوں میں پتھری بننے کے عمل کی روک تھام میں معاون ثابت ہوگا۔ یہ رس بہت زیادہ تیزابیت رکھتا ہے جو پتھری کو گھلانے میں مدد فراہم کرتا ہے اور پیشاب کی تیزابیت بڑھاتا ہے جو پتھری بننے کے عمل میں رکاوٹ کا سبب بنتا ہے۔