یوکرین پرروسی حملے کے بعد سے 45 لاکھ سے زائد شہری جان بچانے کے لیے دوسرے ممالک میں پناہ لے چکے ہیں۔

اقوام متحدہ کی جانب سے جاری رپورٹ میں کہا گیا ہے کہ روسی جارحیت کے نتیجے میں یوکرینی شہریوں کی ملک بدری کا سلسلہ جاری ہے۔

رپورٹ کے مطابق 24 فروری سے شروع ہونے والی اس جنگ کی وجہ سے 25 لاکھ 90 ہزارشہری پولینڈ، 6 لاکھ 86 ہزارسے زائد رومانیہ اور4 لاکھ 19 ہزارسے زائد ہنگری جاچکے ہیں۔

جب کہ ڈھائی ماہ سے زائد عرصے سے جاری اس جنگ کے نتیجے میں اب تک سینکڑوں شہری ہلاک ہوچکے ہیں۔مقامی حکام کے مطابق دارالحکومت کیف کے نزدیکی گاؤں بوزووا میں ایک اجتماعی قبربھی دریافت ہوئی ہے جس میں عام شہری دفن کیے گئے تھے۔

یوکرینی حکام کے مطابق یوکرین ملک کے مشرق میں موجود روسی افواج کے خلاف ’بڑی جنگ‘ کی تیاری کررہا ہے۔ جب کہ شہربرکینوف کے مشرقی حصے میں جمع ہونے والے روسیوں کے خلاف لڑائی کے لیے رضاکاروں کومسلح بھی کیا جا رہا ہے۔

جب کہ جمعے کوکراماتورسک کے ریلوے اسٹیشن پرہونے والی بمباری کے نتیجے میں مرنے والوں کی تعداد 52 ہوگئی ہے، تاہم روس نے اس حملے کی ذمے داری قبول کرنے سے انکارکرتے ہوئے کہا ہے کہ حملے میں استعمال ہونے والے میزائل صرف یوکرینی فوج کی طرف سے استعمال کیے جاتے ہیں۔