نگران وزیراعلیٰ پنجاب عثمان بزدار نے کہا ہے کہ میرے دور میں کسی کو سیاسی انتقام کا نشانہ نہیں بنایا گیا اور نہ کبھی مشکل فیصلہ کرنے سے گھبرایا ہوں۔

حال ہی میں وزیراعلیٰ پنجاب سردار عثمان بزدار کے اعزاز میں الوداعی تقریب منعقد کی گئی جس میں سی ایم آفس، پولیس اورانتظامی افسروں نے شرکت کی اور اعلیٰ حکام نے وزیراعلیٰ عثمان بزدار کی خدمات کو بھرپور انداز میں خراج تحسین پیش کی۔

اس تقریب سے خطاب کرتے ہوئے عثمان بزدار کا کہنا تھا کہ میرا ضمیر مطمئن ہے کہ میں نے ہمیشہ جائز کام کئے، میرٹ کو مد نظر رکھ کر مشاورت سے فیصلے کئے۔

 انہوں نے بتایا کہ وزیر اعظم نے جو بھی فیصلہ کیا ہمیشہ اس کی تائید اور حمایت کی ہے اور استعفیٰ بھی عوام کے بہترین مفاد میں خودکار طور پر دیا ہے۔

اس موقع پر بات کرتے ہوئے چیف سیکرٹری کا کہنا تھا کہ عثمان بزدار نے کام کرنے کی آزادی دی، ہمیشہ میرٹ کو ترجیح دی ہے۔

انہوں نے کہا کہ ان کے ساتھ کام کرنے کا تجربہ بہت خوشگوار رہا ہے ، انہوں نے ہمیشہ رہنمائی کی اور مکمل سپورٹ کیا۔

دوسری جانب آئی جی پولیس راؤسردار علی خان نے کہا کہ عثمان بزدار نے صبر و تحمل سے مشکل وقت سے گزارنے کا طریقہ سکھایا ہے جس کے لئے تمام پولیس افسروں اوراہلکاروں کی طرف سے وزیراعلیٰ عثمان بزدار کا شکریہ اداکرتا ہوں۔