ہالی وُڈ اداکارہ و گلوکارہ جنیفر لوپز نے 20 سال بعد سابق دیرینہ دوست سے دوبارہ منگنی کرلی۔

غیر ملکی میڈیا رپورٹ کے مطابق عالمی شہرت یافتہ امریکی اداکارہ و گلوکارہ جینیفر لوپز نے دیرینہ دوست بین ایفلیک سے 20 سال بعد دوبارہ باضابطہ طور پر منگنی کر لی۔

52 سالہ جینیفر لوپز نے اپنی ویب سائٹ پر ایک مختصر ویڈیو میں اپنی منگنی کا اعلان کیا، جبکہ ویڈیو میں جینیفر کو سبز ہیرے کی انگوٹھی پہنے بھی دیکھا گیا۔

مذکورہ ویڈیو میں جینیفر لوپز کی آواز میں ’آپ پرفیکٹ ہیں‘ کہتے سُنا گیا، گلوکارہ کے قریبی ذرائع نے تصدیق کی ہے کہ کلپ منگنی کے اعلان کی ویڈیو ہے۔

جیسے ہی یہ ویڈیو منظرِ عام پر آئی سوشل میڈیا پر ان کی منگنی کی خبر آگ کی طرح پھیل گئی۔

ویڈیو کے منظرِ عام پر آنے سے قبل گلوکارہ نےگزشتہ شام  اپنے فیس بک پر اشارہ دیا تھا کہ ’کچھ بہت خاص‘ جلد سامنے آنے والا ہے۔

یاد رہے کہ یہ دوسرا موقع ہے جب جینیفر اور ایفلیک نے انگوٹھیوں کا تبادلہ کیا ہے، اس سے قبل  2002 میں، صرف چند ماہ کی ڈیٹنگ کے بعد اداکار نے منگنی کی تھی، تاہم ایک سال کے اندر جوڑی نے میڈیا کی ضرورت سے زیادہ توجہ کی وجہ سے اپنی منگنی ختم کر دی تھی۔

واضح رہے کہ جینيفر لوپز نے 22 سال کی عمرمیں شوبز کی دنیا میں قدم رکھا تھا، انہوں نے کامیڈی شو ان لیونگ کلر میں بطور ڈانسر کام کیا اور خوب شہرت کمائی، اداکاری کی راہوں پر سفر کا آغاز 1997میں فلم سیلینا سے کیا جبکہ 1999 میں ریلیز ہونے والے پہلے میوزک البم آن دی 6 کے زریعے جینیفر نے موسیقی کی دنیا میں قدم رکھا تھا۔