پنجاب فوڈ اتھارٹی کی جانب سے رحیم یار خان میں چوک بہادر پور کے قریب کارروائی کی جس کے نتیجے میں جعلی جوس تیار کرنے والی فیکٹری سیل کردی گئی۔

تفصیلات کے مطابق فوڈ اتھارٹی نے بتایا کہ ملٹی نیشنل کمپنیوں کے نام پر جعلی جوس تیار کرنے والی فیکٹری پکڑی گئی ہے۔

پنجاب فوڈ اتھارٹی کے مطابق 7 ہزار لیٹر مضر صحت جعلی جوس کے ڈبے اور 40 کلو مٹھاس برآمد کرکے تلف کردی گئی۔

فوڈ اتھارٹی نے مزید بتایا کہ جعلسازی کرنے پر فیکٹری مالک کو 2 لاکھ جرمانہ عائد کر کے فیکٹری سیل کردی گئی۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔