پاکستانی کرکٹر شعیب ملک نے اپنے بچے کی گوری رنگت کا راز بتا دیا ہے۔

شعیب ملک نے ایک شو کے دوران انکشاف کیا کہ جب ان کے گھر بیٹے کی ولادت متوقع تھی تو والدہ ثانیہ مرزا کو بہت زیادہ سیب کھلاتی تھیں، تاکہ آنے والا ننھا فیملی ممبر گورا چٹا ہو۔

شعیب ملک کی بات پر اداکارہ اشنا شاہ نے کہا کہ آپ کا بیٹا تو گورا ہی ہے، جس پر شعیب نے کہا کہ دیکھیں ان کی ساس کا ٹوٹکا کام کر گیا، لہٰذا آپ سب خواتین کو سیب کھانے کا مشورہ دے دیں۔

انہوں نے گوری رنگت اور اس حوالے سے لوگوں کے خیالات پر گفتگو کرتے ہوئے کہا کہ دنیا کی ہر خاتون کو یہ اعتماد ہونا چاہیے کہ وہ خوبصورت ہے۔

شو کے دوران شعیب ملک نے یہ بھی انکشاف کیا کہ وہ ہدایت کار اور اداکار یاسر نواز کی جلد آنے والی فلم میں ایک چھوٹا سا کردار ادا کرتے دکھائی دیں گے، تاہم انہوں نے اس حوالے سے مزید کوئی وضاحت نہیں کی۔

دورانِ گفتگو اداکارہ اشنا شاہ نے اپنی رنگت سے متعلق لوگوں کی تنقید کا ذکر کرتے ہوئے کہا کہ میں جِم خود گاڑی چلا کر جاتی ہوں کیوں کہ مجھے یہ پسند ہے، لیکن لوگوں کو ان کے ہاتھوں کی رنگت سے مسئلہ ہے۔

انہوں نے بتایا کہ سوشل میڈیا پر میرے ہاتھوں اور چہرے کی تصاویر کا موازنہ کیا گیا اور ساتھ میں مشورہ دیا کہ اپنے ہاتھ بھی دھو لیا کریں، جب کہ ان کو نہیں پتہ ہاتھوں کے رنگ کا ہاتھوں کو دھونے سے کوئی لینا دینا نہیں، میرے ہاتھوں کا رنگ سورج کی دھوپ کی وجہ سے جل گیا لیکن لوگوں کو پتہ نہیں کیوں ہر معاملے میں بولنے کا شوق ہوتا ہے۔

اُشنا کی بات کے جواب میں شعیب کا کہنا تھا کہ دنیا کی تمام خواتین خوبصورت ہیں اور خواتین کو بھی چاہیے کہ وہ اس بات پر یقین بھی رکھیں اور پُر اعتماد رہیں۔