اینٹی نارکوٹکس فورس (اے این ایف) کی جانب سے باچا خان انٹرنیشنل ایئرپورٹ پر بڑی  کارروائی کی گئی ہے۔

تفصیلات کے مطابق اے این ایف انٹیلیجنس اور اے ایس ایف پشاور نے باچہ خان انٹرنیشنل ایئرپورٹ پر کارروائی کرتے ہوئے محمد شعیب نامی مسافر کے پیٹ سے ہیروئن کے 103 کیپسول برآمد کر لئے گئے ہیں۔

اے این ایف حکام کا کہنا ہے کہ ملزم مسافر غیر ملکی پرواز سے منشیات پیٹ میں چھپا کر بحرین اسمگل کرنا چاہتا تھا۔

اے این ایف حکام نے بتایا کہ ملزم کا تعلق باڑہ ضلع خیبر سے ہے جو گلف ایئرلائن کی پرواز نمبر GF-787 سے بحرین جا رہا تھا۔

حکام کا مزید کہنا ہے کہ کیپسولوں سے مجموعی طور پر 721 گرام ہیروئن برآمد ہوئی ہے جبکہ گرفتار ملزم کے خلاف انسداد منشیات ایکٹ کے تحت مقدمہ درج کر لیا گیا ہے۔

واضح رہے کہ ایک ماہ قبل اینٹی نارکوٹکس فورس کی جانب سے باچا خان انٹرنیشنل ایئرپورٹ پر بڑی  کارروائی کی گئی جس کے نتیجے میں پشاور سے دوحہ جانے والے مسافر سے منشیات برآمد کرلی گئی، مسافر عمران کے بیگ سے 10کلو گرام سے زائد چرس برآمد کی گئی۔

ترجمان اے این ایف نے بتایا کہ عمران کا تعلق فیصل آباد سے ہیں جو نجی ائیر لائین کے ذریعے دوحہ جارہا تھا۔