وزیر اعلیٰ سندھ مراد علی شاہ نے چین کے قونصل خانے میں حکام کو یقین دہانی کرائی ہے کہ جامعہ کراچی میں دھماکے کے ملزمان کو کیفر کردار تک پہنچایا جائے گا۔

جامعہ کراچی میں پیش آنے والے واقعے کے بعد وزیراعلیٰ سندھ سید مراد علی شاہ کی چین کے قونصل خانے میں پہنچے۔

وزیراعلیٰ سندھ سید مراد علی شاہ نے چین کے قونصل جنرل کو وین دھماکے کے حوالے سے مکمل طور پر آگاہ کیا اور انہوں نے دھماکے کے نتیجے میں 3 چینی اساتذہ کے جاں بحق ہونے پر افسوس کا اظہار کیا۔

مراد علی شاہ نے قونصل جنرل کو واقعے کی مکمل تحقیقات کی یقین دہائی کرائی اور کہا کہ دھماکے میں ملوث افراد کو کیفر کردار تک پہنچایا جائے گا۔

وزیر اعلیٰ سندھ نے کہا کہ ہم چینی ماہرین کی ملک و صوبے میں خدمات کو قدر کی نگاہ سے دیکھتے ہیں، کچھ سازشی عناصر وں کوپاکستان اور چائنا کی شراکت داری پسند نہیں، اس قسم کی سوچ اور کرداروں کو آہنی ہاتھوں سے نمٹا جائے گا۔

چین کے قونصل جنرل نے واقعے کے فوری بعد قونصل خانے آمد پر وزیراعلیٰ سندھ کا شکریہ ادا کیا۔

خیال رہے کہ جامعہ کراچی میں غیر ملکی اساتذہ کی وین میں دھماکے کے نتیجے میں 5 افراد جاں بحق جب کہ متعدد زخمی ہوگئے ہیں۔

کراچی یونیورسٹی کے کامرس ڈیپارٹمنٹ اور کنفیوشس انسٹی ٹیوٹ آف چائنیز لنگویج کے قریب کھڑی ایک وین میں اس وقت دھماکا ہوا جب وہاں بڑی تعداد میں طلبہ اور اساتذہ موجود تھے۔

دھماکے کی شدت اس قدر زیادہ تھی کہ ناصرف وین میں آگ بھڑک اٹھی بلکہ اطراف میں گھڑی گاڑیوں اور عمارتوں کے شیشے ٹوٹ گئے۔