بلاول بھٹو نے کہا ہے کہ پاکستان کی عوام دستور کی پاسداری اور جمہوریت کا تسلسل چاہتے ہیں۔

چیئرمین پیپلز پارٹی بلاول بھٹو زرداری نے اٹھارویں ترمیم کو 12 سال مکمل ہونے کے موقعے پر اپنے پیغام میں کہا ہے کہ صدر آصف علی زرداری کی زیرِ قیادت حکومت کے دوران اٹھارویں ترمیم کی منظوری تاریخ ساز کارنامہ تھا۔

انہوں نے کہا کہ اٹھارویں آئینی ترمیم پاکستان کے جمہوریت پسند قوتوں کی عوام دوستی اور پاکستان پسندی کا مظہر ہے، اٹھارویں آئینی ترمیم نے 1973کے متفقہ آئین کی روح کو بحال کیا۔

بلاول بھٹو نے کہا کہ صدر آصف علی زرداری نے اٹھارویں ترمیم کے تحت صدر کو حاصل تمام ایگزیکٹو اختیارات پارلیمان کو دیے، اٹھارویں ترمیم کے نتیجے میں صوبوں کو ان کا حق ملا، وفاق مضبوط ہوا۔

چیئرمین پیپلز پارٹی نے کہا کہ اٹھارویں ترمیم نے صوبہ خیبرپختونخوا کو اس کی شناخت دی، اٹھارویں ترمیم کے بعد کوئی بھی آئین شکن اپنی مرضی کا نقاب نہیں لگا سکتا، پاکستان کی عوام دستور کی پاسداری اور جمہوریت کا تسلسل چاہتے ہیں۔

انہوں نے کہا کہ آئین کو کاغذوں کا پلندہ قرار دینے والی سوچ چاہتی ہے کہ پاکستان افراتفری کا شکار رہے تاکہ اس سوچ کے پیروکار چند افراد ختم نہ ہونے والی افراتفری و انتشار کے دوران اپنے مفادات سمیٹتے رہیں۔

بلاول بھٹو نے کہا کہ پیپلز پارٹی اٹھارویں ترمیم پر مکمل عملدرآمد کے لیے سرگرم عمل ہے، حتمی فتح عوام ہی کی ہوگی۔