مشہور پاکستانی اداکارہ مریم نفیس نے کہا ہے کہ ان کی والدہ بہت کم عمری میں ہیں ان کی شادی کروانا چاہتی تھیں۔

حال ہی میں رشتہ ازدواج میں منسلک ہونے والی پاکستان شوبز کی مشہور اداکارہ مریم نفیس نے ندا یاسر کے شو میں شرکت کی جہاں انہوں نے شوبز اور اپنی نجی زندگی کے مختلف پہلوؤں پر بات کی۔

ایک سیگمنٹ میں سوالوں کے جوابات دیتے ہوئے اداکارہ نے بتایا کہ جیسے ہی وہ 19 برس کی ہوئیں تو ان کی والدہ شادی کے لیے ان کے پیچھے پڑ گئیں اور ان پر بہت دباؤ ڈالا۔

اداکارہ نے بتایا کہ والدہ نے ان پر شادی کے لیے دباؤ ڈالا اور انہیں کہا کہ وہ شادی کے بعد جو کرنا چاہے، کرلیں لیکن اب شادی کرلیں۔

مریم نفیس نے بتایا کہ والدہ نے بہت سارے لڑکوں کو گھر بلایا اور بہت سارے لڑکوں کی تصاویر بھی دکھائیں اور بھرپور کوشش کی کہ وہ کم عمری میں ان کی شادی کروا دیں۔

مگر پھر بھی ان کی والدہ ان کی شادی کروانے میں کامیاب نہیں ہو سکیں، تاہم جب انہوں نے والدہ کو بتایا کہ انہیں امان احمد پسند آگئے اور انہوں نے والدہ کو بتایا تو وہ فوری طور پر ان کے شریک حیات کو پرکھے اور دیکھے بغیر ان کی شادی کے لیے تیار ہوگئیں۔

مریم کا کہنا تھا کہ امان کا بتانے کے فوری بعد ہی والدہ نے انہیں کہا کہ چلو اب جلدی شادی کرلو لیکن انہوں نے اس وقت بھی والدہ کی بات نہیں مانی اور پہلے اپنے ہونے والے شریک حیات کو پرکھا اور سمجھا جس کے بعد ہی شادی کا فیصلہ کیا۔

اسی دوران مریم نفیس کے شوہر امان احمد نے بھی اپنے دل کی باتیں بتائیں اور انکشاف کیا کہ شادی کے لیے پسند کیے جانے سے قبل انہیں مختلف مراحل سے گزرنا پڑا۔

امان نے بتایا کہ مریم نفیس نے شادی کے لیے شرط رکھی تھی کہ اگر وہ ان کی ’پالتو کُتیا‘ (کُو کِی) کو پسند آئے تو وہ ان سے شادی کریں گی۔

امان احمد نے بتایا کہ خوش قسمتی سے وہ مریم نفیس کے ’پالتو کُتیا‘ (کُو کِی) کو پسند آگئے اور وہ پھر انہوں نے دیگر مراحل بھی طے کیے اور ان کی شادی ہوگئی۔