بالی ووڈ کی باربی ڈول معروف اداکارہ کترینہ کیف کے امید سے ہونے کی خبریں سوشل میڈیا پر گردش کر رہی ہیں۔

بھارتی میڈیا رپورٹ کے مطابق گزشتہ سال دسمبر میں اداکار وکی کوشال سے رشتہ ازدواج میں منسلک ہونے والی کترینہ کیف کی ایئرپورٹ پر بنائی گئی نئی تصاویر اور ویڈیوز سوشل میڈیا پر وائرل ہو رہی ہیں جس پر مداح اُن کے حاملہ ہونے کی قیاس آرائیاں کررہے ہیں۔

ان تصاویر اور ویڈیوز میں دیکھا جا سکتا ہے کہ بالی ووڈ کی باربی ڈول نے ایئرپورٹ پر گلابی رنگ کے ڈھیلے ڈھالے کپڑے زیب تن کئے ہوئے ہیں جبکہ عموماً وہ اس طرح کے ملبوسات زیب تن نہیں کرتیں، لباس کی وجہ سے مداح اور سوشل میڈیا صارفین اندازہ لگا رہے ہیں کہ اداکارہ جلد خوشخبری سنانے والی ہیں۔

یاد رہے کہ کیٹ کے مداحوں کی جانب سے جوڑے کو پیشگی مبارک باد دینے کا سلسلہ بھی شروع ہوچکا ہے اور ان کے مداح نیک خواہشات و تمناؤں کا اظہار کررہے ہیں۔

ایک سوشل میڈیا صارف نے لکھا کہ اگر کترینہ واقعی حاملہ ہیں تو یہ بہت بڑی خوشخبری ہے، دنیا میں ان کی جیسی کوئی دوسری اداکارہ نہیں ہیں۔

 ایک اور مداح کا کہنا تھا کہ مجھے صرف کترینہ کیف کی وجہ سے بالی ووڈ میں دلچسپی ہے۔

واضح رہے کہ اس بارے میں کترینہ کیف یا وکی کوشال کی جانب سے تصدیق یا تردید نہیں کی گئی ہے۔