بھارت کے شہر بھوپال میں مقامی میونسپلٹی نے لاکھوں روپے کے بقایا جات پر پورے مسلم علاقے کو پانی کی سپلائی بند کر دی۔

رمضان کے بابرکت مہینے میں بھارت کے شہربھوپال میں گرمی کی شدت نے جہاں سابقہ سبھی ریکارڈ کو توڑ دیا ہے۔ وہیں پانی کی کمی نے مسلمانوں کا جینا دو بھر کردیا ہے۔

بھوپال شہر کے وارڈ 19 اور 23 میں پانی کی سپلائی بند کئے جانے پر کانگریس کارکنان نے بھوپال کے ایم ایل اے عارف مسعود کی قیادت میں احتجاجی مظاہرہ کیا۔

عارف مسعود کا کہنا تھا کہ جان بوجھ کر سوچی سمجھی سازش کے تحت مسلم علاقوں کا پانی بند کیا گیا ہے۔

عارف مسعود کے مطابق صرف چند نادہندگان کی وجہ سے پورے مسلم علاقے کا پانی بند کرنا انسانی حقوق کی خلاف ورزی ہے۔

کانگریس کے ایم ایل اے نے مسلمانوں کے علاقوں میں ٹینکرز کے ذریعے پانی فراہم کیا۔

عارف مسعود نے نگر نگم کے کمشنر کے وی ایس چودھری سے کہا کہ ہمیں وہ گھر بتائے جائیں جن کا پانی کا بل 19 لاکھ روپے آیا ہے۔

عارف مسعود نے کہا کہ اگر مسلم علاقوں کو پانی کی فراہمی شروع نہیں کی گئی تو پھر بھوپال میں بڑے پیمانے پر احتجاج کیا جائے گا۔