سابق صدر پاکستان اور پیپلز پارٹی پارلیمنٹرینز کے صدر آصف علی زرداری نے  ایک زرداری سب پر بھاری کے جواب میں  نیا نعرہ دے دیا۔

میڈیا سے بات چیت کے دوران جب صحافی نے سوال کیا کہ آپ نے ثابت کیا کہ زرداری سب پر بھاری ؟ تو اسکے جواب میں انہوں نے کہا کہ  زرداری کی سب سے یاری۔

صحافی نے ایک اور سوال کیا کہ کیا عارف علوی صدر کے عہدے سے مستعفی ہو رہے ہیں؟؟ جس کے جواب میں انہوں نے کہا کہ نہیں مجھے اسکا معلوم نہیں، ابھی اجلاس ہونا ہے سب چیزیں واضح ہو جائیں گی۔

واضح رہے کہ وزیراعظم کے خلاف  تحریک عدم اعتماد کامیاب ہونے کے بعد شہباز شریف ممکنہ طور پر نئے وزیراعظم منتخب کیے جائینگے جس کا فیصلہ آج ہونے والے قومی اسمبلی اجلاس میں ہوگا۔

شہباز شریف کابینہ میں کون کون شامل ہوگا اس حوالے سے ناموں کی ممکنہ فہرست تیار کرلی گئی ہے۔

اس حوالے سے ذرائع کا کہنا ہے کہ نئی حکومت کی کابینہ کے پہلے مرحلے میں شامل کئیے جانے والے  ارکان کا انتخاب کرلیا گیا ہے۔

ذرائع کا کہنا ہے کہ نئی حکومت  میں محسن داوڑ، اسلم بھوتانی، خواجہ سعد رفیق، مریم اورنگزیب، خواجہ آصف، خرم دستگیر خان، رانا ثناء اللہ، مرتضی جاوید عباسی جبکہ پاکستان پیپلز پارٹی سے شیری رحمان، مصطفی نواز کھوکھر اور شازیہ مری کو وزارت دئیے جانے کا قوی امکان ہے۔

ذرائع کا دعوی ہے متحدہ قومی موومنٹ کو بھی سندھ میں گورنر شپ اور دو وزارتیں ملیں گی جبکہ پنجاب میں پاکستان پیپلز پارٹی کو گورنر شپ دی جائے گی۔

ذرائع کا یہ بھی دعوی ہے کہ سب سے بہتر وزارت طارق بشیر چیمہ کو دئیے جانے کا امکان ہے۔